Muita giente ten studado i feito trabalhos subre ls trabalhos agrícolas, subre las tradiçones, subre ls traijes, subre la léngua, subre mil i ua cousa, mas ten sido un studo andebidual cun ajudas de muita giente, mas pouco queda para la comunidade i quando outro quier cuntinar esse trabalho, ls decumientos zaparcírun.
Ua cama de fierro de l tiempo de ls reis
Ua romana cun cientos d’anhos
Estes son dous eisemplos de cousas que debemos guardar, mas cumo estas quantas yá se perdírun? Muitas fúrun para a outras tierras ou acabórun nun fierro bielho qualquiera. Mas ye amportante que las cunserbemos porqui, para amostrar l que fúrun ls nuossos ferreiros, la sue arte, l sou saber. Cumo se trabalhaba l fierro i sei alhá que mais.
Ua penheira
Ua çaranda
Mas destas cousas hai muitas dezis bós, pus si, mas quando se quier studar ua cousa dessas nunca la achamos i al amostrar-bos hoije estas cousas ye para bos poner a pensar que podemos recolhir muita cousa i tener-la, mesmo na casa de cada un, mas nun sitio apropiado para quando fazir falta.
Un sedeiro
Ua sierra
Tenemos que fazer de Sendim un museu, nó ua casa cerrada ou un sitio para ir alhá ua beç ne l anho, mas que todas las casas guarden un cachico de la stória de Sendin i de ls sous pais i abós. Quando todos ampeçarmos a guardar un cachico de l nuosso passado, stamos a ser mais sendineses, mais ourgulhosos de ls nuossos i de la nuossa stória.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
