Quarta-feira, 09 de Setembre de 2009 (09-09-09), ye para muitos l die mais sperado de l'anho, specialmente pals chineses, qu'associan l númaro 9 a la suorte i al sucesso, sperando qu'este ralo momento de l calendário marque la çfrença ne l rumo de las sues bidas.
L 9 ten un segnificado special, i nun solo na cultura chinesa, mas na mitologie de dibersas culturas, stando associado an quaije todas a la medida eisata de la busca de probeito, al corolário de ls sfuorços, al ancerrar dun ciclo i ampeço d'outro superior, yá que ye l maior númaro singular.
L númaro 9 stá tamien relacionado cul eilemiento fuogo, talbeç porque las bestes de l Amperador Chinês, normalmente apersentában figuras de nuobe dragones i porque, segundo se acradita, estes tenien nuobe filhos cada un.
Tamien se julga que l palácio de la Cidade Proibida , an Pequin, fui costruído cun 9.999 quartos.
Nuobe ye tamien l númaro de sferas celhestres, d'oríficios de l cuorpo houmano i de ls meses de grabideç.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
