La feira de ls Grazes de Sendin, feira que tenie l nome de feira de ls burros, porque era nesta feira que se fazie l maior negócio desses animales i tamien de las mulas, fui ne ls dies 24 i 25. Era siempre ne l die 30 de Outubre, mas passou para l último fin de semana de l més.
La feira I
Solo quien bibiu l tiempo, an que ls burros i mulas éran l percipal negócio, puode fazer eideia de cumo era la feira i la rezon deilha. Acabada la recuolha de ls últimos fruitos i cun la chegada de l friu i de las giladas, pouco habie que dar que fazer als animales i l comer scasseaba tamien. Habie tamien las nuobas crias i uns por necidade i outros para fazéren uns binténs, acorríen a esta feira.
La feira II
Uns aprobeitában para mercar ls animales que le faríen falta para l anho i outros mercában para se aporbeitáren de la necidade de ls outros. Cumo hoije, l denheiro mandaba. Mas la feira era tamien de roupas i artimanhos i nada faltaba nesta feira d’anho. Tamien hoije ye la maior feira de l Praino.
La feira III
Mesmo cun algua chuba, nun faltórun este anho ls bendedores i la giente para mercar las mercancias. De todo l Praino se biu giente.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
