L die de las bruxas passou a ser comemorado l die 31 de Outubre na Ouropa, por bias de la tradiçon Amaricana que fizo deste die un die de las bruxas (Halloween). Mas cumo apareciu essa eideia? Porque la tradiçon assi l trasmitiu, fruito de ls colonizadores Angleses i Eirlandeses que la lebórun para alhá. Halloween ye ua palabra anglesa que ben de All Hallows Even ( Nuite de Todos ls Santos).
L 31 de Outubre era quando ls Celtas comemorában l Samhain , un de ls uito períodos, an que debedien l anho. Era l tiempo an que ls spritos de ls muortos regressában para bejitar ls bibos. Era l ampeço de l Anho Nuobo Celta. La tradiçon mantubo-se siempre an toda la Ouropa , l que lebou l Papa Gregório III, an 855, a mudar l die de Todos ls Santos, que se comemoraba an Maio, para l die 1 de Nobembre.
Todos sabemos que las nuossas tradiçones ténen muito a ber cun la tradiçon Celta i tamien Sendin tenie la tradiçon de comemorar la nuite de ls spritos. Inda me lembra bien de fazer las mascarilhas cun las bóbedas, cun ua bela an drento, i de las ponermos na Preça de casa por bias de l spritos que benien ne l die 31 a la nuite.
De die de ls spritos passou a die de las bruxas i hoije ye un die mais para ua fiesta que muitas scuolas comemóran culs sous alunos i quando calha an Sábado ou Demingo, cumo este anho, comemóran-lo ne l die de scuola anterior.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
