La Associaçon de ls Bumbeiros de Sendin fizo onte la sue cena de Natal que ajuntou ls bumbeiros, la fanfarra, ls derigentes i ls familhiares de todos ls que quejírun associar-se a la fiesta. Pulas 19h30m fúrun-se ajuntando ne l café de la associaçon i a las 20h fui la cena ne l salon. La nuite staba frie porque sopraba l aire de Touro que fazie atrecir l mais pintado.
Antes de la cena íban-se ajuntando ne l café
Este tubo mesmo miedo al friu
La cena
La cena fui serbida por Eisidro i todo corriu bien, naide parecie anfastiado, ye siempre un die an que ls familhiares que stan fuora bénen a passar las bacanças de l Natal i esta cena sirbe tamien para muitos se ajuntáren al fin de l tiempo que stubírun fuora i podéren falar i cumbibir.
L’antrega de ls cumbites
Cumo nun podie deixar de acuntecer, dórun-se cumbites als ninos de todos, ye siempre un momiento de alegrie yá que ls ninos quíeren melhor ls cumbites que l quemido. Mas ls maiores tamien tubírun l sou cumbite, porque nesto de recebir naide se faç rogado, até nós quedemos cuntentos cul cachecol que mos dórun.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
