L moto clube de Sendin ourganizou mais un ajuntouro de motas i jepes TT, cumo ben sendo uso ne l tiempo de l’antruido. Bieno giente de todo lado del çtrito i habie muito spanhol tamien. Estas probas ban sendo yá mui coincidas i son tamien un modo de cumbibéncia i de dar a coincer Sendin.
L ajuntouro de jepes i motas
Antes de ampeçar la proba puls caminos
L ajuntouro ampeçou onte cun ua cena an que nun faltórun ls quemeres regionales i a la nuite fui la proba para jepes, puls caminos del Pilo até Penha Campana i dalhi a Trabanca, tornando para Sendin puls caminos anti(g)os. Hoije por la manhana fui la proba por ls caminos de Penhas Falcon até Gregos onde fui l’almuorço.
La salida
Caras a la Cruç Quebrada
Apuis de l’almuorço tornórun para Sendin por ls caminos de Atanor i a la tarde fui la proba de hablidade junto a la oufecina nuoba de Catorze, na Fachaç. Todo corriu bien i naide se friu i pal anho haberá mais. Sendineses que stais fuora, an beç de irdes para outros lados, passai l’antruido an Sendin porque bale la pena.
Ls jepes puls caminos
Cumo se puode ber, inda bai habendo quien mantenga esto animado porque gusta de Sendin. A todos ls que stais loinje, ajudai las nuossas associaçones, nin que seia solo cun ua palabra de amisade. Hoije ye die de gordo, nun bos sabie bien l buolho cun cascas?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
