Cumo todos ls anhos las scuolas de Sendin i alredores fazírun l çfile de l antruido i zde ls mais pequeinhos als maiores todos colaborórun bien. Ls mais pequerruchos stában que era un ancanto i cumo eiqui nun puodo meter todos ls retratos, podeis ir a ber ne l sitio de ls retratos , todo l çfile, cun mais de 40 retratos.
Ls mais pequeinhos
Todos ls anhos hai nuobas eideias i este anho houbo ua de ls garotos de la primária, alunos de la porsora Ção, que fizo ua banda cun anstrumentos feitos puls alunos, cun la sjuda de ls pais i cun fatos i máscaras tamien mui bien feitas. Era buono guardar estas cousas porque ye un trabalho amportante.
La banda
Muita giente pulas rues a ber l çfile, nesta Sesta de Febreiro, que mais parecie un die de Primabera. Ls dies inda son pequeinhos i al fin de la tarde yá fazie friu, mas l calor de ls garotos nin daba para pensar ne l friu de l die.
La giente na rue de Camino Prado
I junto al Ciclo
Outra de las nuobas fui l anterro, ua paródia de antruido, feita puls ampregados i porsores de l Ciclo, que muito animórun tamien l çfile. L próprio padre Silba stubo a ber l çfile i riu-se de ber l Bispo i la freira tan bien repersentados.
L anterro
Mas para ber melhor l que fui l çfile, ide a ber ls retratos. L HOIJE stá siempre onde hai cousas de Sendin i que fázen la nuossa tierra bibir. An Miranda stubo la telbison i para alguns sendineses fui mais amportante que ls ninos de la sue tierra, nun falo de ls que fázen parte de la Camara, porque tenien la oubrigaçon de star alhá.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
