QUIEN SABIE?
Gago Coutinho fui un de ls purmeiros abiadores de Pertual i apropiou al sextante un hourizonte arteficial, que permetiu fazer cun maior sigurancia la purmeira biaije de Pertual al Brasil, nun abion. L sextante ye un apareilho que sirbe para ourientar la nabegaçon, quando nun se béien outros puntos de refréncia a nun ser las streilhas.
Gago Coutinho i Sacadura Cabral
Stou a screbir esto porque un sendinés fizo parte de ls que íban ne ls barcos, para ne l Ouceano Atlantico, ajudáren ne l que fusse perciso durante la biaije i screbiu todo nun libro de que bos mostro ls retratos. La biaije fui nun abion que podie parar ne l mar i por esso, habie barcos para ajudar, porque l abion tenie que fazer la biaije por eitapas.
La capa de l libro
La purmeira fuolha
La assinatura
L libro inda stá tal qual l screbiu Domingos Augusto Fernandes, assi se chamaba esse sendinés. Yá ne l die 4 de Outubro de 2007, l HOIJE falaba nesto. Buolbo a falar, porque Gago Coutinho naciu ne l die 17 de Febreiro de 1869 i morriu l die 18 de Febreiro de 1959, cun 90 anhos i un die. Fizo onte anhos que naciu i hoije que morriu.
Inda bos lembrais desta nota?
Gago Coutinho quedou na stória de Pertual por tener sido, cun Sacadura Cabral l purmeiro a fazer ua biaije de abion até al Brasil, antre outras cousas amportantes que fizo, cumo la melhorie de l sextante . Ls sous feitos fúrun recoincidos i ua nota de 20$00, tenie la sue eimage.
Deixo-bos cun ua frase amportante, dita por el i que bien se puode aplicar als tiempos que stamos a atrabessar: “para tenermos cunfiança an nós, percisamos saber adonde stamos i para adonde bamos".
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
