La Associaçon Recreatiba i Çportiba de Atanor stá a realizar l sou torneio de FUTSAL, que ye yá un de ls melhores torneios de l Çtrito. Este anho tem a partecipar eiquipas de todo l Çtrito i mesmo de fuora de l Çtrito i nas eiquipas hai bários jogadores de la purmeira debison nacional.
Son férias, mas todos gústan de ajudar las eiquipas de la sue tierra i ye por esso que muitos jogadores federados bénen eiqui mesmo para se ajuntáren i passáren un fin de semana difrente. Passar férias ne l Praino ye tamien agradáble i Atanor ye un sitio adonde l turismo se faç tol anho, nun fuora la sede la AEPGA - (Associaçon que portege la raça de burros de l Praino).
Hai eiquipas que tráen muitos familhiares para passar l fin de semana i ls moços i moças son la maiorie. La animaçon tamien ye amportante i ye por esso que l torneio ampeçou Sábado a las 15h i solo acaba cun la final a las 17h de Domingo, cun jogos cuntinuos, mesmo durante la nuite houbo jogos, dende le chamarmos ua maratona.
Ls retratos amóstran bien l que stá a ser l torneio i mesmo l serbício de bar tubo que ser alargado para fuora de la sede de la Associaçon , para poder serbir melhor a todo mundo. Ls diretores de la Associaçon son ancansábles para que todo cuorra bien, trabálhan por la sue Associaçon, para nun stáren dependentes solo de las ajudas. Debe ser eisemplo para muitas outras Associaçones de l Praino.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
