Hoije ye l die de la cidade de Miranda i feriado munecipal, rezon porque houbo fiesta an Miranda. L ’Hoije tamien stubo alhá i son de la fiesta i de la cidade las eimages. Muitas son las eimages de la cidade, mas hoije queremos amostrar-bos ua que pouca giente ten, la bista por la antrada de la Mesericórdia.
Las cerimónias de l die de la cidade ampeçórun cun l lhebentar de las bandeiras de la Ouropa , de Pertual i de la cidade. Ls bumbeiros de Sendin i Miranda fazírun la guarda d’honra i la banda de Miranda tocou l’hino de la cidade. A seguir fúrun las apresentaçones de libros i cd’s i dançórun las pauliteiras de Miranda.
Grabemos an bideo l’hino de la cidade tocado pula banda, que pensamos poucos oubírun, mas que deixaremos para las geraçones que benerán apuis de nós. Tocado pula banda de la cidade, ne l die de la cidade i na praça an frente de la câmara, cudamos que será einédito. Ye assi que preserba la cultura.
Tamien grabemos alguas danças de las pauliteiras, que quedarán tamien ne ls bideos de l youtube i de l sapo. Quien sabe se nun haberá denheiro tamien para ls poner nun cd , mas cumo l Pe. Mourinho, nun andamos por ganhar denheiro ou aparecer i ser amportantes, esso ye para mercenários de la cultura.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
