Curso antensibo de mirandés i cultura mirandesa
De 21 a 24 de Júlio puode daprender a falar i a screbir mirandés cul curso antensibo de mirandés i cultura mirandesa.
Esta ye ua eniciatiba lebada de la Associaçon Recreatiba de la Mocidade Mirandesa cul apoio de la Cámara Municipal de Miranda de l Douro.
Este curso cunta cula participaçon de dibersos studiosos de la segunda léngua oufecial que durante quatros dies de curso ban a ansinar todos ls antressados a falar mirandés.
Sposiçon “ua Bejita al Legado de António Marie Mourinho”
La Biblioteca Munecipal de Miranda de l Douro bai a fazer la sposiçon “Ua bejita al legado de António Marie Mourinho”.
Esta ye ua mostra qu'ampeça yá ne l próssimo die 9 cula einouguraçon marcada pa las 18 horas. La mesma tremina a 10 de Setembre.
Lembro que nesta sposiçon ban a star persentes bários decumientos deste home que fui un eisemplo de dedicaçon i paixon de todo l que diç respeito al cunceilho mirandés, zde la léngua, cultura, stória, etnografie i até mesmo coreografies.
Deste modo, ls curjidosos pula bida i obra de António Marie Mourinho púoden quedar a coincer melhor este estudioso mirandés.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
