Hai un tiempo para todo i Sendin precisa de se preparar para l feturo para nun tener que andar atido als outros. Nós quando ne l HOIJE i mesmo noutros sítios ampeçamos a falar nas cousas que ban a suceder, parece que fazemos mal a alguas pessonas, mas se falamos ye porque queremos que todos stéian atentos para nun sermos apanhados çcalços cumo sucediu cul Agrupamento de Scuolas.
Pul bideo podeis ber ls dous presidentes de las câmaras mais amportantes, un de l PS i outro de l PSD a faláren de la mesma cousa, la regionalizaçon i yá ende stá eilha, quier se querga, quier nun se querga, hai que ampeçar a trabalhar nesso i tenemos que deixar ls antresses de cada un para trás i ampeçar a tratar ne l antresse de Sendin. Ban a acabar alguns Cunceilhos i alguas Juntas de Freguesie, queremos acabar solos i ancurralados?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
