Las sementeiras stan ende cun toda la fuorça i ye sembrando que se puode colher. Sabemos bien las deficuldades de la agricultura, mas siempre bai sendo un modo de acrecentar riqueza al paiç. Muitas bezes oubimos dezir, que trabalhar na agricultura ye ampobrecer cun alegrie. Puode ser berdade, para l que trabalha na agricultura, mas l paiç queda siempre mais rico, por esso hai que ajudar ls trabalhadores agrícolas.
Ls bumbeiros de sendin ban tamien fazendo pula bida i esta nuite trabalhórun cun gusto para que la nuoba garaige por trás de l semitério seia yá ua realidade. Ajudórun a fazer l suolo de la garaige, que yá stá an cimento i drento de pouco tiempo stará pronta a recebir ls carros que yá nun cáben ne l quartel.
L turismo relegioso tamien bai a ser ua aposta para todo l território de l Douro i l porjeto “Douro religioso” ten yá prebista la “Temporada de Musica Religiosa” cun 18 cuncertos nas eigreijas de l Douro i la Sé de Miranda i la eigreija matriç de Mogadouro son dous locales para ls cuncertos. L’Alma, grupo coral de sendin puode benir a ser un de ls cumbidados.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
