SÃO MARTINHO DO PESO
Retrato de Vítor Coelho
Na nuite de l die de Natal, na eigreija de San Martino de l Peso houbo un fuogo, que çtruíu l presépio i un altar, quedando ls outros bastante sragados, assi cumo l telhado. L fuogo deberie tener sido apegado pulas lâmpadas de l presépio, mas hoije pula manhana nada se sabie inda de cumo todo acunteciu. Quando ls bumbeiros chegórun yá la giente habie apagado l fuogo.
AECT DUERO-DOURO
Trabanca sede la AECT
L’Agrupamiento Ouropeu de Cooperaçon Territorial (AECT) Duero-Douro reuniu ne l sábado, die 18, an Assemblé Giral. Ne l'ancuontro, que tubo lhugar na Casa de la Cultura de Mogadouro, fúrun çcutidas “questones d'amportança bital” pa l feturo de l'antidade. La reunion tratou del porgrama ouperatibo de l AECT Duero-Douro, l punto de situaçon de l Porjeto Self-Prebention de reintroduçon de las cabras na frunteira, ls porjetos POCTEP i de la Strada Berde (custruçon dua bie dupla pa l tráfego i turismo). Fui inda çcutido l'acordo subre l'eificiéncia einergética na eiluminaçon pública an to l território de l AECT Duero-Douro i l cumben pa l'acraditaçon de la biabelidade de porjetos pribados d'acesso als fondos de l Banco Ouropeu de Ambestimiento.
GIACOMETTI AN MIRANDA DE L DOURO
Ne l próssimo die 2 de Janeiro ban a ser dibulgados an Miranda de l Douro, a partir de las 16 horas ne l Ouditório Munecipal, ls documentairos que Michel Giacometti grabou an Paradela i San Martino. Ne l'anho an que se assinálan 20 anhos de l zaparecimiento de l'eitnomusicólogo, la Tradisom , an parcerie cula RTP i l jornal Público, eidita la FILMOGRAFIA CUMPLETA DE MICHEL GIACOMETTI, an 12 belumes. Esta eidiçon reúne cuntribuiçones de dibersos ambestigadores cuntando cula participaçon special de l retratista Augusto Brázio.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
