Este anho ls Grazes tornórun un pouco a las sues ouriges, porque ls Grazes fúrun al percípio de dous dies, porque ne l purmeiro die era la feira dels burres, cumo ls antigos dezíen, porque era quando se mercában las béstias para l trabalho agrícola del anho, ó se bendíen ls burrecos i las guçalas que se habíen criado.
La feira dels burres acabou mais por bias de la crise desse tiempo, que oubigou tamien a oumentar ampuostos i a seguir diretibas ouropeias. Houbo que cuntrolar las animales i passórun a percisar de guia i de stáren decumentados, mas era solo a ua cierta çtancia de la strada, que ls guardas oubrigában a amostrar ls papeles. Las feiras de Sendin i Dues Eigreijas fúrun las mais afetadas, porque quedában miesmo acerca de la strada. Un die screbiremos mais subre esso, mas queda eiqui ua pequeinha splicaçon.
Hoije yá fui ua buona feira i stubírun muito spanhol, que ajudórun a que ls negócios corríssen melhor. Puls retratos podeis fazer ua eideia de cumo staba la feira, fui lhougo cedo que tiremos ls retratos, por esso inda nun se béien muito cumprador, mas tamien l spácio era mui grande i cabíen melhares de pessonas spalhadas por ende.
