Tols anhos se fai l magusto nas scuolas de Sendin, ne l més de Novembre, este anho fui hoije i miesmo cun la crise, ls alunos i porsores nun quejírun quedar sien comer las castanhas. Ls presidentes de la Junta i de la Câmara tamien se associórun i l respunsáble pula euducaçon nel çtrito tamien se ajuntou a la fiesta. Hai fiestas i fiestas, mas esta ye ua de las que se debe fazer siempre, porque la cumbibéncia faç falta a la bida i para quien stubo alhá, cumo fui l causo del HOIJE, fui ua alegrie ber cumo se puode cumbibir cun alegrie i amisade. Nun faltórun las sardinas i la marrana i tamien l mais amportante que fúrun las castanhas assadas.
Ls alunos anfarruscórun-se i todo fazírun por dar trabalho a las labadeiras, que manhana muito tenerán que fazer.
Por la manhana houbo corta-mato i a la tarde atibidades culturales.
Stamos miesmo a ber ls sendineses que stan pul mundo i béien estas eimages a dezir:
- Yá nun conheço a naide, de quien seran estes garoticos todos?
Pus de buossos parientes i amigos i de giente que bieno de fuora para bibir an sendin.
