CONVÍVIO DA ORGANIZAÇÃO - 20-04-2012
La ourganizaçon de la Ronda de las Degas de Atanor, fizo onte l sou cumbíbio anual para porparar la nuoba “Ronda das Adegas” que se bai a fazer ne último fin de sumana de Maio.
Apuis de la cena cun arroç de lhiebre i galho caseiro refogado, azeitunas, pomientos de l binagre i fruita, na taberna de la ACDA (Associação Cultural e Recreativa de Atenor), houbo musica, jogos tradecionales e animaçon cumo podeis ber pul bideo.
Esta ye ua de las atibidades mais ricas culturalmente de l Praino. I dezimos esto porque quatro associaçones se ajúntan cula populaçon i cun quien querga partecipar para se fazer un fin de sumana çfrente. Ye la Associaçon de Atanor, la “Lérias” de Palaçuolo, la APEGA (Associação do Gado Azinino) i la ALDEIA de Bomioso, cun todos ls sous associados, que fázen todo. L persidente de la Junta de Freguesie de Atanor faç la ligaçon antre todos i cordena las atibidades.
Todas las ajudas son bien benidas, mas sabemos bien que nun hai muita possiblidade de las antidades çponéren de denheiro, mas nun ye por esso que nun se fázen las cousas ó bamos a creticar la câmara. Tenemos que agradecer al persidente i a la bareadora de la cultura, l que para nós ye l mais amportante, que ye l sou ancentibo i colaboraçon ne l que ye possible. I hai muito cun que la câmara ajuda tamien.
