Ls nuossos studantes tamien fázen bejitas de studo i tamien nun squécen la realidade de l Praino. L’agrupamiento de scuolas de Miranda i Sendin quier que ls sous alunos conhéçan bien l Praino i las sues anstituiçones i agro-andustrias para ls senseblizar i podéren un die tomar cunta deilhas. Hai que fazer cun que ls nuobos téngan amor pula nuossa tierra i assi, melhor podéren tratar de l sou feturo.
Esta bejita fui a la Copratiba Ribadouro i cumo deixa ber l retrato, quedórun cuntentos. Tamien fui anteressante béren la recuperaçon de ls balones de bino antigos, que hoije sírben para salas de bejitas i probas de bino. Esta ye ua einobaçon i ua amostra de cumo se puode perserbar la stória i l’ambiente. Cumo se puode eibitar l çperdício i de l bielho fazer nuobo. Esto tamien ye reciclage.
