Quando l porblema de la fame i la globalizaçon son ls temas mais amportantes de la atualidade, las pessonas ban-se dando cuonta de la amportancia de ls pequeinhos trabalhos que puoden fazer, para contraponer als grandes monopólios que ls quieren abangar. Mas l home soubo siempre rejistir.
Ua huorta cun patatas yá bien crecidas
Quando muitos cuidában que la laboura familhar acababa ou inda ténen essa sprancia, ye melhor que béian la realidade. La stória zde que eisiste, mostra-mos que nada cunsigue bencir l home. Yá houbo ampérios, ditadores, terramotos, guerras, sei alhá quanta cousa pior, mas l home soubo siempre ancuntrar la traba de salbaçon.
Que ye que torna possible esto?
Esto solo ye possible, porque l home, antes de todo, ama la liberdade. Esto nun ye trabalho, ye ua forma de liberdade, de poder tener l que percisa sien star atido als outros. Nun ye por l ganho an denheiro, mas por l sentimento de liberdade, que ye un ganho muito maior.
Un poço por pie
Inda dízen que nun tenemos menumentos!... Será que las pessonas stan a quedar ciegas ou nunca se dórun cuonta de l que ye la berdadeira felcidade? Quantos de bós, al mirardes para esta huorta nun sentis un pouco de grima? Para ls que dízen, que l que you scribo, ye lindo, mas la bida nun puode ser assi i nin sequiera ye assi, solo bos pregunto:
-Mas se fusse assi nun serie melhor?
-Mas nun puode ser para todos, dezis bós.
-Mas las grandes fiestas, cumo la que dou onte na telbison, tamien nun son.
Bamos anton a dar balor al que tenemos de buono. L sossego, l aire puro, l ambiente saludáble, la paç. Mas tenemos que cobrar tanto cumo ls outros mos cóbran, bamos a eisigir por cunserbar las arribas, tanto cumo mos cóbran para podermos ir a ua fiesta de gala.
Inda hai muitos sítios cumo este
I yá hai cereijas maduras
Ls que andais por l mundo, lembrai-bos de l buosso termo i ls moços i moças, quando benirdes acá ide a ber ls paraísos que hai por ende. Amai l buosso termo, mais que l aire poluído dels bares i de las cidades.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
