Stabamos ne l anho de 1985 i fazie you parte de la Câmara de Miranda, que nesse mandato fui cunsiderada la Câmara modelo de Pertual, quando demos un loubor a un restourante de un sendinés, L lareira , an Mogadouro. Ben esto a porpósito, porque inda hoije stube alhá a almorçar i falemos nesso.
L loubor de 1985
Passados que fúrun 22 anhos, l turismo pouco eiboluiu i ye pena que nun se faga mais por esso. Muito se diç de que ye perciso ambestir na culidade, mas parece que se ban squecendo de ls que siempre apostórun na culidade. La proba ye que l restourante ne l anho passado tornou a recebir outro loubor, este de l turismo.
L loubor de 2007
Ls loubores son cousas que se puoden dar, muitas bezes solo por dar, mas ls que se dórun a este restourante, fúrun dados porque ye l sitio, an Pertual, onde melhor se trata la chicha i onde ye mais tenra. Son ls specialistas que l dízen i que you puode cumprobar hoije miesmo.
Esto nada ten a ber cun la puosta mirandesa, que ye an Sendin, onde se faç melhor, mas se se ajuntássen las dues cousas, anton serie algo inda mais special.
Fui almorçar alhá cun la mie mulher, mas paguei
Quando se ancóntran sendineses anteressados na sue tierra la cumbersa ye siempre buona. Falemos de muita cousa que ye amportante para l turismo, por esso l debate de l die 27 deste més, ne l salon de ls bumbeiros de Sendin, bai a ser anteressante.
Eliseu junto de la lareira
Por aqueilho que el me dixo, l turismo stá a crecer i la última telenobela, que se passa an Bila Flor, faç benir muita giente de todo l paiç. Outra cousa que me dixo fui que ye perciso renobar las cundiçones i apostar mais nun serbício melhor.
Ua obra de un scultor sendinés
Nas paredes de l restourante puoden ber-se obras de José Nobre, scultor sendinés que fizo las sculturas, que stan na praça de Miranda de l Douro.
Para quei passar la bida a lamentar l passado quando l persente i l feturo stan yá ende? Ye cun estes sendineses que tenemos que caminar.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
