Fazer atibidades an que la Câmara ou l Turismo ou l IPJ ou ls anteresses de momento págan, nun ye nada. Son cumo you dixe hai uns dies, son foguetes que stóuran. Nós tenemos que fazer las cousas para las pessonas i cun las pessonas, sien star dependentes de subsídios.
Un grupo a besitar l Centro de música
L sitio onde se grában músicas
L Festibal Antercéltico ten sido un de ls melhores modos de pormober l turismo, se ye cierto que ten tamien apoios, la berdade ye que la receita paga quaije todas las çpesas. I l que faç por la pormoçon de Sendin nun se puode cuntablizar. Son muitas las pessonas que durante l anho buolben a Sendin, que coincírun durante l festibal.
La besita a la fraga de la lapa
Las graburas
Mesmo ne l’Ambierno se puode ir pul campo
Son muitos ls grupos que bénen i que porcúran l Centro de Música i ls que me bénen a pedir para ls acumpanhar an besitas por bários sítios i bárias aldés. Neste tiempo de Natal i Anho Nuobo acumpanhei alguns grupos, alguns que yá sabien tamien de l HOIJE i quedórun de benir mais bezes. Naide l pagou para beníren, bénen porque gustórun i alguns quieren cumprar casa.
La besita al Centro de Atanor
Nun son solo ls que bénen para sacar nuobas ou porque ténen políticos amportantes coincidos, mas l pobo anónimo que ben porque gusta i trai amizade.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
