La giente mete-se nesto de querer ser jornalista i que ten l poder de screbir i dezir l que l dá na gana i apuis balendo-se desso a que cháman segredo porfissional ou dreito de nun dezir quien l’anformou, passa a tener l rei na barri(g)a. You yá quaisque bou quedando assi, solo por screbir este jornaleco tols dies.
Las alfaces
Nun tengo l rei na barri(g)a porque tengo que fazer dieta, mas tamien porque nunca fui de muito quemer. Por esso sou un jornalista de dous çtones, que nun sendo cumo ls que bálen libras d’ouro, tamien nun sou cumo ls que solo bálen un binten. Sendo assi, siempre bou fazendo cuonta de ls que me scríben.
Manadas de cebolino
Perguntórun-me l que era l alforraque, si, porque hai muita giente que lei l HOIJE i quier saber de la nuossa léngua i de la nuossa cultura. La mie oubrigaçon fui fazer la nuoba d’hoije, subre l’alforraque.
L’alforraque ye un bibeiro de plantas, para mais tarde poner noutro sitio. An Sendin, ne ls sítios mais abrigadosos i acerca de l riu, fazien ua leirica, onde sembrában l cebolino, las berças, ls tomateiros, ls pomientos i cousas assi i apuis íban a bender nas feiras.
Ls tomateiros
Na feira de Mogadouro aparécen mais cedo, porque bénen de baixo, de ls sítios mais calientes i lougo, na purmeira feira de Março, yá hai de todo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
