QUIEN M’ACUDE ?!
Hai muitas cousas que nun púoden falar, mas que quando miramos para eilhas, mos fázen sentir quelubrinas, porque son cumo pessonas que agarradas al catre dua cama, por fuorça de ua dessas malinas a que cháman AVC i nun podendo falar, mos míran cun ls uolhos a dezir l que sínten.
L molino de un lagar de azeite, la parte de andrento ye de madeira
You nunca antes habie bisto ua cousa assi, l bielho molino de azeite, cumpletamente abandonado, mas rejistindo a las centenas de anhos que yá ten. Inda me lembra de l ber moler azeituna, mas agora ye un monte de cousa pouca. Mas quando me arrimei a el, parecie preguntar-me porque l’abandonórun.
La pila de la parte de fuora de l lagar
La puorta de l lagar
Será este un de ls mais anti(g)os i todo diç que ye ua cópia de ls molinos que ls romanos usában quando porqui andebírun. La áuga era aporbeitada, la que corrie na rue i cun caçuolo era botada na pila, por fuora de l lagar i que apuis corrie por un pequeinho buraco para ser calcida an drento, para apartar l azeite. Quando nun corri la de la rue, traien-la de l ribeiro.
La buraca adonde apoiaba la parte de trás de la bi(g)a
La azeituna era apertada por ua bi(g)a de madeira que tenie na puonta un fuso cun ua piedra einorme i que anroscando na bi(g)a, la fazie abaixar subre la massa de azeituna, arrodeada por ua córrea de cuolmo. Nun bou splicar cumo todo se fazie, mas dou-bos la nuoba de que l lagar inda poderie ser amanhanado i fui esso, que el me quijo dezir quando fui alhá.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
