2giga · 29/01/2007

Yá sabemos que l purmeiro poema publicado an mirandés fui screbido por José Leite de Vasconcelos.

Corrie l anho de 1884, era l més de Setembre, José Leite de Vasaconcelos miraba pa la paisaige de la tierra de Miranda mirrada pula calor, miraba pa ls cabeços sbranquenhados de fenascos e restroilhos, ls adiles atenegrados, ls cerrados yé sien yerbas i arrodiados de freznos a rezar por auga; José leite de Vasconcelos miraba pa la cidade de Miranda que habie parado ne l tiempo, apuis la guerra de ls Siete Anhos, an 1763; miraba pa las aldés sien ua parede branca, las casas negras de cantarie i de probeza; miraba subretodo para aqueilha giente tiznada pul sol, ancalhada puls temporales i trabalhos que mal la sustentában; José Leite de Vasconcelos, un moço de pouco mais de 20 anhos, al mirar para todo esso, nun podie deixar de preguntar:

- Cumo ye possible? Si, cumo ye possible que esta giente, que nien sabe ler, houbira cunserbado esta lhéngua tan rica, que cuntina a correr, pura, zde hai tantos seclos? Cumo ye possible que tanto saber se tenga agarrado a este pobo, sien scuolas, sien scrita, sien academies, sien scritores de nomeada, sien l apoio de l poder?

Fúrun preguntas cumo estas i outros spantos assi grandes que stubírun na raíç de l poema de José Leite de Vasconcelos, l purmeiro poema publicado an lhéngua mirandesa:

Quien dirie q’antre ls matos eiriçados,

Las ourrietas i ls rius desta tierra,

Bibie, cumo l chougarço de la sierra,

Ua lhéngua de sons tan bariados?

Mostre-se i fale-se essa lhéngua, filha

Dun pobo que ten neilha l choro i l canto!

Nada por cierto mos cautiba tanto

Cumo la forma an que l’eideia brilha.

Zgraciado daquel, q’abandonando

La pátria an que naciu, la casa i l huorto,

Tamien se squece de la fala! Quando

L furdes ber, talbeç que steia muorto!

I eiqui stamos nós a cumprir l mandado de l poeta:

Mostre-se i fale-se essa lhéngua, filha

Dun pobo que ten neilha l choro i l canto!