2giga · 18/05/2007

Hoije bamos a ler uns bersos mui adbertidos dun amportante poeta mirandés, Manuel Preto. Ls bersos cháman-se La bruxa de trás las peinhas.

Trás las peinhas moraba

Nua cabanha ua tie...

Tenerie uns quarenta anhos,

Quarenta anhos tenerie.

No Cabeço i no Toural

Parientes sous nun habie...

Nun se sabe donde bieno

I naide la conhecie.

Cumo falaba outra fala,

Doutras tierras benirie...

Mas nun se sabe de donde,

Nien de que raça serie.

Las lhanas fuortes i dreitas

Cumo ua perra assanhada,

Mostraba an cada oureilha

Ua argolhona colgada.

Tiesta abierta, nariç lharga,

Na cara grande, uns pelotes,

Un diente a spreitar na boca

Antriçada antre uns bigotes.

L queixo partido al meio

(Que más parecien dous queixos!),

Manos çúzias, unhas lhargas,

Siempre ampunhadas cun xeixos!

Tetas secas a la muostra

I ua çamarra nas nalgas

Que nun cobrie quaije nada...

Quando seguie sou camino,

Chupada cumo ua palha,

Era la muorte acabada!

Dous uolhos cumo dues brasas,

Era l papon an persona

A spirolhar quien passaba!

Todos passában por eilha

Cabeça baixa, a tembrar,

I nien un só la miraba!

Porque dezien por eilhi

Que de ls uolhos de la bruxa

- Que se chamaba Armingarda­ -

Salien chiçpas que furában

Ls uolhos que la mirában,

Cumo tiros de spingarda!

Nos pies tenie caçcanhetas

Duras, negras i redondas

Cumo las ténen las bacas!

Se passaba por piçarras,

Ou pisaba l carambelo,

Era um rugir de matracas!

I al falar an carambelo,

Nun quiero deixar squecido

Que, se la bruxa l pisaba,

Botaba fumo i quedaba

Lhougo an auga derretido!

Nun tenie alas la tie,

Cun que podisse bolar,

Nien barbatanas tenie

Cun que pul'auga nadar...

Mas nun se sabe cun quei

Nien mesmo de que maneira,

Nun abrir i cerrar d'uolhos

Passaba dun lhado al outro

De l'Anguileira!

Solo anquanto se diç ai,

Cun un poder milagroso,

Zaparecie de l Cabeço

I aparecie no Toural,

Sumie-se n'Adroso

I bie-se no Rebulhal!

Bírun-l'andar pul'auga,

Uas bezes de nuite,

Outras bezes de die!

La giente andaba maluca

Cul raio de la tie!

Ancarrapitada nas arbles,

Bolando de crona an crona,

Fazie dezir a la giente:

«Ou ye la tie de l'diabo,

Ou ye l'diabo an persona!»

Manuel Preto, Bersos Mirandeses, 1993