amadeu · 31/01/2007

Eisercício (10) - Bamos a screbir - I

L nuosso curso yá lhieba uns pouquitos de meses i por esso, aperpongo-bos hoije la scrita dun pequeinho testo. Ye un eisercício que bamos a passar a fazer de tiempos a tiempos, indo de testos mais simples para testos mais cumplexos, cunsante l gusto i las possiblidades de cada un.

Al mesmo tiempo, cuntinaremos a fazer eisercícios que ténen que ber cul studo de la gramática i, an giral, culas formas de la lhéngua mirandesa, yá que nesse campo inda tenemos muito que daprender. Por esso, bai a haber mais do que un eisercício al mesmo tiempo, inda que cun prázios defrentes para séren ambiados.

Screbir bai a oubrigar, als poucos, a pensar an mirandés, i subretodo, a buscar l bocabulairo mais cierto pa l que queremos dezir. Cumben respeitar las regras que eiqui bou deixando, i todo bai a correr bien. Uas(uns) yá ténen mais prática, mas esso nun amporta. L amportante ye ir acumpanhando, sien miedo de dar erros, que ls resultados ban aparecendo als poucos.

Tema pa l purmeiro testo:

Porque rezon stou a fazer un curso de mirandés ou de cumo ye amportante l mirandés para mi.

Númaro máximo de lhinhas: 10.

Prázio de ambio: 12 de Febreiro.

Forma de l testo: lhibre (prosa, poesie, carta, etc.)

31 de Janeiro de 2006

Amadeu Ferreira