amadeu · 07/07/2007

Curso SAL de Lhéngua i Cultura Mirandesa – 1º anho

Chegou al fin l 1º anho de l Curso SAL de Lhéngua i Cultura Mirandesa. Ampeçou an meios de Setembre de 2006 i fui crecendo debagarico até se tornar nun éisito, que einougurou l ansino de l mirandés pula anternet [e-learning]. Esso, solo por si, yá serie un feito. Tamien por bias de l curso de mirandés, l SAL andubo an bolandinas pula telbison, la rádio i ls jornales, i son hoije muitos ls blogues que reméten pa l SAL.

Quando ampecemos l curso nun faziemos bien eideia de l que iba a ser, mas als poucos fui-se defenhindo, i até aulas de fala passou a tener, l que al percípio nien perbisto staba. Tamien fúrun menistrados ls cuntenidos básicos de Gramática Mirandesa i de Bocabulairo Mirandés. Pa l 2º anho haberá que cuntinar cula gramática, zambolber l bocabulairo i ampeçar nuobas lhiçones de stória, de cultura i de lhiteratura mirandesas. Al mesmo tiempo haberá que cuntinar ls eisercícios para zambolber i melhorar la scrita de l mirandés.

Houbo alredror dua dúzia de alunos que patecipórun de modo rigular nas atebidades de l curso. Muitos outros houbo que l acumpanhórun sien querer amostrar-se. Hoije, puode dezir-se, nuobas pessonas stan a screbir mirandés cumo debe de ser grácias al curso de l SAL i al sou sfuorço [cada ua/ua debe de cuntinar a screbir an mirandés, tanto eiqui ne l SAL cumo an outro sítios, cumo http://frolesmirandesas.blogspot.com que stá abierto a quien alhá querga partecipar. L amportante ye que l mirandés screbido i falado passe a ser ua cousa normal]. A todos se debiu l ancentibo para lhebar l curso palantre i para que tubira meios i fuorças para screbir ua grande quantidade de cuntenidos anteiramente nuobos, que ende quédan i puoden ser aporfeiçados. Mas hai que cuntinar que inda hai muito para falar.

Nada haberie sido possible sien l apoio custante de Pedro Marcos, siempre atento, para alhá de el haber sido l mais grande antusiasta de l ampeço de l curso. Un muito oubrigado, Pedro.

L 2º anho ampeça l die 15 de Setembro de 2007

L 2º anho de l Curso SAL de Lhéngua i Cultura Mirandesa bai a reampeçar quando las outras scuolas. Nessa altura possiblemente bai a haber nobidades, quanto al modo cumo l curso se bai a zambolber i l material se bai a ourganizar i cumo las pessonas ban a partecipar. L’eideia ye poder atrebuir un DIPLOMA relatibo a quien faga l curso de l SAL cun éisito, a quien quejir, claro. Mas esso son cousas a pensar i a purparar durante l berano. Claro que serie buono recebir sugestiones subre cumo há de ser esse segundo anho, i eilhas puoden ser ambiadas eiqui pa l SAL ou para amadeuf@gmail.com

Antonce, bun çcanso para todas/os i até qualquiera die, l mais tardar l 15 de Setembre que ben.

07 de Júlio de 2007

Amadeu Ferreira