amadeu · 24/09/2007

Eisercício 002. Ampeçar[I] - Resoluçon

a) - Este eisercício tenie a ber cula eidenteficaçon de algues regfras de scrita mirandesa mui simples, i que eiqui se lhémbran las prencipales, repetindo ls eisemplos de l eisercício:

- an mirandés nunca se scribe –m an fin de palabra, mas siempre –n [agabórun, nun, cústan, un, gústan];

- an mirandés úsa-se lh- an ampeço de palabra an beç de l-, nó an todos mas an muitos casos [lhabado, lhino, lhençoles, lhinares, lhéngua, lhanudas, lhebantou];

- l abc de l mirandés nun ten la letra -v- pa la scrita de las palabras normales, ousando-se b an beç deilha [andaba, tornaba, bal, aprobada, nobecientos, nobenta, nuobe, falaba, oubido, oubie, berano, debagarico, screbir, beniste, biento, lhebantou];

- nunca se usa –z an fin de palabra, mas –ç [feliç, juiç, paç, diç, faç];

- regras própias pa l uso de l –x- que ten balores tamien própios [xabon, xordo, xefe]

b) - Estas son regras simples, mas que nun podemos squecer nunca. Quiero dá-le ls parabienes a todas(os) pul sfuorço i pul bun resultado. Agora cada ua/un acumpara la seluçon cul que respundiu i bei adonde ten que melhorar.

Bamos yá a cuntinar cun nuobos eisercícios de rebison, para dar un bun aliçace a estas i outras regras.

c) Resoluçon, ponendo a negro l que nun staba bien:

1 – Andaba ua rapaza mui feliç porque le agabórun l peinado, mas solo habie lhabado la cabeça cun xabon.

2 – L juiç mandou-lo an paç para casa, cuidando que nun tornaba a fazer mal.

3 – Agora yá naide fila l lhino, que nun bal l précio que cústan ls lhençoles i nun hai auga para arregar ls lhinares.

4 - La lei de l mirandés fui aprobada an mil nobecientos i nobenta i nuobe.

5 - La lhéngua mirandesa yá se falaba na Eidade Média, pus ye un ramo de la lhéngua de l Reino de Lhion.

6 - L tiu era xordo dun oubido, mas diç que oubie melhor que naide.

7 - Las canhonas gústan de pacer na fresca de l berano, mas se fúren lhanudas agárran muita calor.

8 – Faç bien l que fazires, i serás xefe de ti mesmo que ye l mais defícele.

9 – Cumo stou a ampeçar, nun admira que m’anganhe; mas debagarico chegarei a screbir bien l mirandés.

10 – Beniste a buona hora, que inda nun hai lhunar i l biento inda nun se lhebantou.

24 de Setembre de 2007

Amadeu Ferreira