amadeu · 02/10/2007

Eisercício 004. Lhembrar II - Resoluçon

Gustei de las repuostas, inda que se béian ciertos erros sien necidade pus se bei que ye falta de algue atençon. L testo ten partes cumplicadas i nun era fácele achá-le seluçones. Assi i todo, algues seluçones achadas son bien antressantes. Agora bou-le a mandar un e-mail a cada ua de las pessonas que fazírun la traduçon, subretodo a apuntar ls erros de cada ua/un.

L que eiqui deixo ye la mie traduçon, yá que bárias seluçones puodien ser aceites cumo buonas. Traduzir ye un eisercício mui pessonal, se çcuntarmos ls erros, claro. I ye un eisercício que eisige un sfuorço amportante na busca de l bocabulairo, na buona cunjugaçon de ls berbos, etc. Assi i todo deixo alguns comentairos subre algues palabras ou spressones.

Traduçon:

A la cena, l amo, cun mala cara, negara-le las fiestas deste modo:

- Deixa-te mas ye de adbertimientos inche-me esse bandulho, que manhana pula manhana cedo, nien que chuoban piedras de molino…

Tal i qual. Metiu la biuola al saco, claro, i atirou-se a la racion cumo pudo. Mas nun le benie la gana. Inda tenie ne l stómado ls toijos que retouçara a la tarde ne l monte, i andaba, sien saber porquei, cul coraçon apunhado. Para alhá desso, aqueilhes modos de l duono até parecie que dában mais dureç al feno. La giente tamien bibe de buonas palabras. I, berdade seia dita, gustaba de l fulano. Çque el, hai seis anhos, na feira de ls binte i trés, l çtinguira al meio dun regimiento de béstias i le dira ua palmada rija ne ls quadriles, gustara-le la figura arranada, burmeilha, a respirar salude i bundade.

- Quanto custa l burranco?

- Binte lhibras.

- Nun ye figura para tanto denheiro. Ai l almanecha a çfazer!

- Binte lhibras, nien menos un rial.

- Deixe l polhino por dezasseis, i yá ye caro cumo lhume…

L cigano! Mas lhougo que biu cuntar las dezassiete monedas i agarrá-le la rede, cantou alaluias. Staba farto de las borracheira de l Perguiças. Chenico até las oureilhas de chubir la maldita costielha de la Queda a oubir-le las pragas de borracholas. Mas era un macho! Aguantaba ne l lhombo quinze alqueires de zgrácias. Stribado nesso, l molineiro, cun carpanta ó sien eilha, nas feiras, ponie l précio an binte lhibras. Resultado: naide l lhebaba.

Notas a la mie traduçon:

patrão – amo, ye La palabra tradecionalmente ousada an mirandés.

com cara de poucos amigos – cun mala cara, mal ancarado, cun malo calantriç [puode haber outras seluçones]

recusara-lhe – negara-le [l berbo recusar puode ser aceite sien porblemas pul mirandés, i nun stá mal, mas neste testo nun me parece l mais al modo.]

brincadeiras – fiestas, adbertimientos, brincadeiras [.... i muitas outras seluçones possibles.]

bandulho – pança, bandulho, barriga

nem que chovam picaretas – son ousadas bárioas spressones bien antressantes. Eiqui ye l gusto de cada un que manda. You gusto de la spresson mirandesa: nien que chuoban piedras de molino. A la letra serie: nien que chuoban picaretes.

meteu a viola no saco: metiu la biuola al saco; nun rezingou, nun refunfenhigou.

penso – racion, raçon

despontara – retouçara [retouçar: comer las puntas de l mato, an giral, l ganado que anda pul monte. Assi, acaba quaije por ser un termo técnico. Bários outros son ousados, mas nun son tan rigorosos cumo este]

de coração apertado: coraçon apunhado/apertado...

azémolas: béstias

simpatizara: gustara-le

regimento: regimiento, caterba

ancas: quadriles, nalgas, spaldas. You, ne l causo, scolhi quadriles, que me parece mais adequado.

figura atarracada: figura arranada / amperrunhada / ancalcada / aparchacada

bonomia: bundade, serenidade

jerico: burranco

estampa: figura, stampa

alma do diabo: alma de l diadro, almanecha

desfazer – caçuar, fazer caçuada

garrano: machico, polhino, burrico

caro como o fogo: caro cumo l lhume

cantar aleluias: cantar alaluias, cantar bitória

bebedeira – borracheira, carpanta.

002 de Outubre de 2007

Amadeu Ferreira