amadeu · 01/10/2007

Eisercício 003. Ampeçar II - Resoluçon

Ora eiqui queda la resoluçon de l Eisercício OO3 - Ampeçar II. Inda sperei un cachico a ber se mais giente respundie, mas beio que de las/ls nuobas/os que s'anscrebírun ls mais deilhas/es nun bieno a este eisercício. Spero que aparéçan pa l próssimo i nun téngan miedo de dar erros, pus esso ye l normal para quien ampeça. Este ye un camino que se bai fazendo debagarico, pus mesmo las/ls alunas/os que yá stubírun anscrebidas/os l anho atrasado inda dan algues gralhas nestes eisercícios simples, cuido you que por falta de atençon. De todas las repuostas solo hai ua que nun ten nahun erro i cada ua/un berá la sue.

Chamo hoije la atençon para ls causos cumo puntica, palumbicos, funtaninas, cumplicada, an que la scrita ye siempre cun -u- antes de m/n, se la sílaba fur átona.

Bamos inda a cuntinar a fazer destes eisercícios simples, inda que metendo nuobos casos para resolber. Tenemos un lhargo anho a la nuossa frente i nun hai que zistir nien zanimar que las deficuldades son para ser bencidas i nó para eilhas mos bencíren a nós.

I a las/als nuobos digo-le que nun téngan miedo de quedar para trás, que you nun deixo a naide para trás, inda que esso segnifique mais trabalho i mais sfuorço.

Resoluçon:

1. Passaba-se l riu por ua puntica i apuis chubie-se un camino de lhadeira.

2. Tenie uns oulhicos que daqueilha beç quedórum berdes por bias de la berdura de l pan.

3. Era mui bun rapaç, mas nun gustaba que le dezíssen que era buono nien de dar las buonas nuites.

4. Habie alhá dous palumbicos que al bolar lhebantórun muito puolo de l suolo.

5. La fuonte tenie uas funtaninas de piedra.

6. Staba ciego cula claridade de l sol, i solo la tierra berdegaba.

7. Dolie-me ua muola [diente molar], i tenie que andar cula boca abierta i buer uns bunchicos de augardiente.

8. Apuis de caliente lhougo me deixaba drumir, mas ne l tiempo de la niebe lhougo se me sfriában las piernas.

9. Las ciguonhas yá bolbírun mas inda nun ténen cigonhicos, mas yá ponírun ls uobos.

10. Quienquiera dá dieç [númaro 10], mas se fúren trezientos la cousa yá ye mais cumplicada.

11. La scuola yá ye mui antiga, mas siempre recebiu bien to la giente.

12. L xabon stá duro cumo un xeixo, mas nada melhor para lhabar l que está puorco.

01 de Outubre de 2007

Amadeu Ferreira