amadeu · 31/10/2007

Eisercício 005. Lhembrar IV. Resoluçon

Eiqui queda la resoluçon de l eisercício lhembrar 005 [na nuoba numaraçon apuis de l arranjo de la arrimaçon], para reber la cunjugaçon de ls berbos. L nº 01 tenie un erro miu, yá que le faltában dues palabricas que agora pongo sublinhadas [a ser], mas parece que naide dou por esso yá que muita giente cunjugou l berbo ir cumo se fura l berbo ser. Quando fur assi cunto cula buossa ajudar para corregir l que stubir mal.

An alguns de ls casos serie possible poner l berbo noutro tiempo, mas l mais amportante era que la cunjugaçon stubisse cierta.

Jesé Mialito [Fracisco] i Conceição [auch] scolhírun screbir solo cun l- an ampeço de palabra a la moda de l mirandés de Sendin, i fazírun mui bien, pus assi lhogo se çtingue que son sendineses.

01. El acenhaba-le (acenhar) –le, mas cumo eilha num querie (querer) saber del para nada, el anchaba (anchar) -se cumo un boto, i ainda nun iba (ir) a ser desta que arrunsarie (arrunsar) para fuora de l sentido aqueilha pantasma que por muito tiempo inda l asselumbrarie (asselumbrar).

02. Nunca biaijo (biajar) a las purmanhanas, senó nun me cunsolo (cunselar) de quedar na cama aqueilhes cachicos a que até l sol gusta (gustar) de le dezir: you bos saludo (saludar) raízes de l die!

03. Inda que nós nun témbremos (tembrar) cul friu, nien el zombe (zumbar) de nós, nun hai (haber) que deixar que l febre buolba (bolber), senó apuis nun hai (haber) termómetro adonde puoda (poder) caber.

04. Se l altemoble coubir (caber) na garaige, nun l deixes (deixar) na rue, pus ls gatos chúben (chubir) para anriba del i arregúnhan (arregunhar) -lo todo.

05. Por eilhes colhéren (colher) tanto grano ye que trábalhan (trabalhar) sien paraige, mas cuorren (correr) na mesma pa l trabalho, porque yá se afazírun (afazer) a essa manha mala.

06. Se bós quereis (querer) que nós bos cuosamos (coser) ls rasgones de las calças, teneis (tener) que bos znudar, a ber se daprendeis (daprender) a andar cun mais cuidado quando bos ides/furdes (ir) por ende.

07. Çque muolen (moler) la farina ne ls molinos you nun me amporto (amportar) de comer l pan, porque assi muorde (morder) –se melhor i queda (quedar) mais dóndio.

08. Quando las bacas yá nun pácen (pacer), lhieban (lhebar) –las para casa que las han (haber) de lhebar al ferrador, i assi podéren (poder) aguantar la sementeira sien se ponéren (poner) mancas.

09. Nun reinhas (renher) cul rapaz que el nun ten (tener) la culpa de l que se passou (passar) onte a la noite i, inda porriba, yá resolbiu (resolber) todo.

10. Tu arrefuce (arrefucir) –me essas mangas i bota (botar) –le uns galhos a la bacas que ls ruoban (rober), mas nun scuolhas (scolher) de ls mais gordos, senó nun ínchen (anchir) l bandulho cumo debe de ser.

11. Saliu a la ruga [rue] i lhougo se le angaranhírun (angaranhir) las manos, de modo que yá nun angriu (angrir) la carga, i por esso stubo (star) para se caier, mas se cuçpira/cuçpisse (cuçpir) nas manos talbeç houbira/houbisse (haber) resolbido l porblema.

28 de Outubre de 2007

Amadeu Ferreira