amadeu · 25/02/2007

editada dia 25-02-2007 11:35:47 por: amadeu

Eisercício (12) – testo cun adebina andrento

L testo que a seguir s’apersenta fui publicado an 1995. Faç parte dun remanse screbido an pertués, mas cun pequeinhas partes an mirandés. L outor, que ye mirandés i falante de la lhéngua mirandesa, screbiu las partes mirandesas respeitando solo l modo cumo falaba, yá que nessa altura inda nun habie la Cumbençon Ourtográfica de la Lhéngua Mirandesa. Por agora nun bou a dezir l nome de l outor i de l lhibro, que desso falaremos un cachico quando fazirmos la correçon de l eisercício.

Cuido que las preguntas seran un cachico defrentes i algo mais defíceles que an eisercícios atrasados, mas ye assi que bamos abançando.

1. Testo

- Los suonhos nunca son berdadeiros, ora nó? Iou sonho tantas bézes que ancontro denheiro espargido no tchano e fico todo contento a apanhá-lo e quando espérto beio que iê todo mintira!...

- A las bezes los suonhos son berdadeiros.

- Iou sonhei eiqui hái tiêmpos que habie partido un diente. Pareciê mésmo que era berdade!... Quando espertei até lhebei los dedos a la boca para tener la certeza. Tu sabes que sonhar côm diêntes iê sinal?!... Pus olha, mésmo naquel diê se morriu la mêa Pimpona que era la baca melhor que iou tênêa.

(....)

- Quantos anhos tên la bôsa Castanha?

- Iê la más bielha de todas... Tên doze anhos... Iê mai de la Dourada e abó daqueilha bezerrica... Quiêro ber se la bendo na feira dêl Nazo de Setembro.

- Porque la quereis bander?

- Porque iê biêlha para trabalhar e iá nun ampreinha. E tu sabes biên que un bitelico por anho fai muita falta. Iá se béndan por diêzz notas nas feiras.

- Côitadicas de las bacas!... Los homes só las quiêran anquanto eilhas trabalhan e lês dán bitelos. Quando ambelheçan béndan-las e nun quiêran saber más deilhas. Olhai se fazisen lo mésmo côm las personas!...

- Tenes rezon, mas nun pôde ser doutra maneira. La bida iê mésmo asi.

- Mas las bacas biêlhas nun ampreinhan?

2. L que se pide neste eisercício ye:

2.1. – Dezir an que bariadade de mirandés stá screbido l testo i justeficar la repuosta dada [Quien tubir dúbedas puode tornar a ler la classe 006 – Ounidade i bariedade de l mirandés].

2.2. – Screbir l testo cunsante las regras de la Cumbençon Outográfica de la Lhéngua Mirandesa, i que ténen a ber cul mirandés central.

Tiempo máximo de repuosta: die 4 de Márcio de 2007 até al fin de l die.

20 de Febreiro de 2007

Amadeu Ferreira