amadeu · 18/02/2007

Eisercício (11) – ditado al alrobés - resoluçon

Stube uns dies fuora, sien anternete nien nada, i por esso solo agora torno al curso.

Para melhor ajudar cada ua/un a ber la sue repuosta, pongo a negro las palabras que nun stában bien screbidas. Neste eisercício era mui amportante saber que tiempo stábamos a screbir, cousa que you quije deixar claro ne l cuntesto, mas por algues repuostas beio que nien siempre cunsegui. Assi i todo beio que cuntinamos a abançar i ye esso que hai que registrar, pus repersenta l sfuorço de cada ua/un.

1. Onte you screbi un testo que muitos yá lírun, mas nien todos gustórun del.

2. Se eilhes s’ancantórun cula rapaza, ye seinha de que yá demudórun muito; mas por muito que demúden i por muito que se rebuolban, yá quantá que se quedórun para trás i nun bai a ser fácele que arríben.

3. Nien por tener alas mais grandes l páixaro bolarie melhor, porque las cousas nácen al modo de cada cousa; se las alas crecíssen mais do que l percisado, nun botarien fuorça bastante pa las abanáren.

4. Anda culs uolhos bien abiertos, que ls caminos nun ánchan se nós nun bulhirmos neilhes.

5. Fugirie mais debrebe se ls çapatos pesássen menos; mas cun çapatilhas até bolaba, i nien sei se haberie quien me agarrasse.

6. Lhebariemos las cousas melhor se mos ríramos mais; mas l mais de las pessonas nun se ríen nien gústan que nós mos ríamos, pus cúidan que stamos a fazer caçuada deilhas.

7. Ls pastores salien pula manhana cedo, quando l sol inda nun lhuzie i las canhonas pacien de mais buona gana.

18 de Febreiro de 2007

Amadeu Ferreira