amadeu · 02/03/2007

Eisercício (13) – Bamos a screbir II

Apuis la purmeira spriença de scrita dun testo oureginal, i cun buns resultados, bamos a cuntinar por esse camino. Desta beç para screbir subre l tiempo.

Dízen que un, quando nun ten nada que dezir, fala de l tiempo. La berdade ye que l tiempo ye de la questiones mais defíceles i cumplicadas que hai, a punto de nun chegarmos a saber bien l que ye. Mas nun ye dessa catadorie filosófica de tiempo que bos pido para screbir, i si de l tiempo que cun nós bibe a todos ls dies i tamien dá por nomes cumo friu i calor, dies i sumanas, meses i anhos etc. Tamien dun tiempo que nun torna, un tiempo que ye de l nuosso tiempo, l tiempo datrás ou l tiempo d’hoije, you sei alhá, un tiempo que mos oubriga subretodo a falar de nós, que caminamos puls sous carreirones.

Mas inda gustarie de m’achegar a un tiempo mais cercano, mais cuncreto i, por esso, le pido a cada ua/un para falar de l eimbierno: puode ser l eimbierno dastanho (que stá a dar las últimas) ou de hai muito tiempo, rial ou figurado, ou anton cada ua/un puode agarrar l eimbierno para falar de l que le dir la gana. Si, que l eimbierno tanto agarra fama de general que na Rússia que derrotou a Hitler i a Napoleon, cumo puode serbir de títalo a remanses cumo aquel L Eimbierno de l nuosso Çcuntentamiento, de John Steinbeck, anque outros scritores téngan gustado mais doutras staçones cumo aquel Outonho de l Patriarca de Gabriel Garcia Márquez. Anque le chame tema, al eimbierno, el ye mais ua forma de ampeçar un testo adonde puode caber la lhibardade de cada ua/un, antrando por essa puorta que ye la mala cara de l tiempo, mas tamien sprança de melhor tiempo.

Para apoiar la scrita destes testos, ampecei a publicar classes de bocabulairo que que trátan deste assunto ou tema, i adonde se dan tamien algues splicaçones.

Tema de testo oureginal: L Eimbierno.

Máximo de lhinhas: 20.

Forma: a la scuolha de cada un (cuonta, poema, carta, antrebista...).

Prázio: até 20 de Márcio.

02 de Márcio de 2007

Amadeu Ferreira