amadeu · 13/05/2007

Eisercício (17) - resoluçon

Cumo yá tengo dezido muita beç, bei bien que tenemos andado camino. Alguns erros bei-se que son solo por falta de atençon, talbeç porque ls eisercícios parécen mui fáceles, mas a la bezes angánhan. Deixo solo dues notas: la 3ª pessona de l plural de l persente de l andicatibo de l berbo fazer tanto puode ser fáien cumo fázen, mas la purmeira forma ye mais ousada pul mirandés central; la palabra delor ye maculina i por esso se diç l delor, i solo houbo ua pessona que acertou (ber la licion 011) i bamos a ber se zde este eisercício yá naide se squece.

Eiqui queda la resoluçon de l eisercício para cada ua/un ber bien cumo fizo. Parabienes a todas/os, que até you quedo spantado culs abanços que bamos fazendo. Mas tenemos de cuntinar i nun zistir nien quedar a mei camino.

1. Ls rapazes datrás gustában mais de ir pa la tropa, pus muita beç esse era l modo de salíren de la sue tierra i habie alguns que aporbeitában para studar i, al menos, fazer la quarta classe; outros sacában alhá la carta de cunduçon que datrás serbie para ir a saber dun amprego; tamien habie quien na tropa matubisse la porfisson que lhebaba de la bida cebil, cumo tal panadeiro, cozineiro, barbeiro; agora tamien las rapazas ban pa la tropa i nun se quédan atrás de ls rapazes, yá que ténen muita proua cul que fáien i puoden fazer todo l que fázen ls rapazes, seia ne l eisército, na fuorça aérea ou na marina.

2. Dezie que nien que andubisse mil anhos serie capaç de s’afazer a tan mala bida, mas a las bezes nun hai scuola cumo la de la bida; bonda mirar pa la bida que ls nuossos pais lhebórun/lhebában i eilhes que remédio tubírun senó bibi-la l melhor que podírun/podien; muita giente yá naciu apuis de l 25 de Abril, i por esso inda bien que nun tubo que ir pa la guerra quelonial adonde tanto moço se morriu i de adonde tantos benírun cula cabeça albrotada i malinas que inda hoije le sínten ls eifeitos i, subretodo, ls delores; nun haber lhibardade ye malo, mas inda porriba haber ua guerra anjusta esso ye bien mais malo i muita giente mais quier scapar.

13 de Maio de 2007

Amadeu Ferreira