amadeu · 20/12/2007

Eisercício (Mensaiges) 009

Stamos a poucos dies de l Natal I dun Nuobo Anho, tiempo para mos desermos l buono i l bien. Yá l anho atrasado fazimos un eisercício destes I astanho torno a fazer l zafio, de eiqui cada ua / un deixar la sue mensaige de Natal i/ou Anho Buono. Cada ua / un poderá ousar de la sue eimaginaçon i apersentar mensaiges guapas, que puoden ser mais grandes ou mais pequeinhas.

L tiempo para deixar eiqui las mensaiges ye até al die 31 de Dezembre deste anho.

Por mi, deixo yá eiqui la mie mensaige:

Este ye un tiempo an que tornamos a nós, an que relhembramos i an que tamien bibimos momentos de grande antensidade. Cuido que nós, las pessonas, percisamos assi duns tiempos para pensarmos la bida, l passado, l feturo i an para pensarmos nós i ne ls que stan alredror de nós. Esso puode ajudar, pouco que seia, a que l mundo baia para melhor. Todo para alhá de las cantigas i de l que se dá, se recibe ou se compra. Para alhá de nós l mundo cuntina, cun alegrie I fatura nuns casos i cun muito sufrimiento i fame noutros, que son de mais, mas nós tamien somos mundo i ls que stan al redror de nós.

Quiero desear a todas las pessonas que partecípan neste curso, ou que solo pássan por el, muitas felcidades, muita salude i bida nuoba, que seia siempre melhor.

Antre todos cuido que podemos desear a la lhéngua mirandesa un anho de 2008 cheno de éisitos, que la ajúden a agarrar baláncio para poder cuntinar biba por muitos i muitos anhos. I que cada ua/un de nós puoda cuntrebuir cun todas las sues puosses para que assi seia. Nesse sentido, este cursico ten dado la sue mano i spero que todos téngamos salude i gana para cuntinar a dar essa upa, que la nuossa lhéngua bien percisa.

Cuido que momentos cumo estes, ls que tenemos eiqui bibido ne l nuosso curso, nun ye fácele repetíren-se, I poe esso bamos a aporbeitá-los l melhor que podirmos. Que porjetos cumo este se multeplíquen, que será assi cum pequeinhos rieiros cumo este poderemos fazer ua corriente fuorte.

Un bun Natal i un anho de 2008 cun salude i cuncretizaçon de porjetos, para todas/os i cada ua/un de bós.

20 de Dezembre de 2007

Amadeu Ferreira

auch · 21/12/2007

Ua caixa chena de Alegrie,

Ua bota bien grande cun muita Salude,

Ua saca que s'arrama de Sprança,

Streilhas que relumbran na Paç,

Muitas i buonas Surpresas, que cumo pequenhas lembrancias nos deixán chenos de gana,

Sabedorie para ultrapassar las cuntrareidades que ban aparecendo pul camino...

anfin, UN BUONO NATAL I QUE 2008 SEIA UN ANHO DE REALIZAÇON D'ALGUES
ANSEIOS,

Conceição

adeusdado · 21/12/2007

Natal

Este tiempo friu ye l mais adequado pal Natal. A las bezes na telbison, bemos outras pessonas de la parte de ambaixo de l´eiquador a celebrar l Natal na praia. A mi nun me parece que seia Natal, quando ye Berano. Anton l que ponan ne l presépio? I l pai Natal l que beste? Mas çpuis bem-me a la eideia que hai outras religiones, i que tamien tenan dreito l sou Natal, çfrente claro. Mas tamien eiqui bien acerquita de nós hai muitas çfrenças. Na nuite de la cunsoada, bemos tamien muitas ourganizaçones nas grandes rues de las cidades a çtribuir caldo i bolho rei a las pessonas, que por razones nin siempre sabidas biben na rue. Son muitos ls Natals que hai, cumo se puode ber. You lhembro-me siempre de ua frase de un probe que dezie- “ You gusto de l Natal, nó por mi, mas puls outros”, porque ls beio mais cuntentes.

A todos ls deste SITE i a todo l Mundo Buonas Fiestas i un Anho de 2008, cheno de salude.

Válter Deusdado

francisco · 21/12/2007

Bouno Natal para todos e bouno anpeço d´anho, que haba salude para quien stá, alegrei para quien anda desanimado. para quien biba en guerra.
You bou a tener un Natal como nunca tube, del que sintirei mais falta i a mais de 6000 km, ye de las pessonas, i de l´aire friu, i de passar la noite até l die anclariar a la borda de la fogueira en Sendin.
Tamin bou a passar l natal como diç ua pessona abaixo de manga curta que camisola yá nun se me lembra quando la besti la ultima beç. Tamien nun parece Natal sien friu.
Mas las pessonas deiqui tamien dirán que Natal sien ir a lá praia, tamien nun será Natal. La bida será conforme cada un la bibe i an cada momento.

Bouno Natal i feliç anho noubo.

Tonux · 24/12/2007

Buonas nuites a todos, alunos i porsor
You nun tengo podido benir eiqui, porquei tubo un pequeinho porblema de salude. Spero nun tener perdido muito an materia de liciones i de l mirandés dun modo general.
You deseio a todos ye uas santas fiestas para to ls partecipantes i porsor. Pronto spero star de buolta para daprender más de l mirandés.
Un buon Natal i un feliç Anho Nuobo.
Salude
Tonux

almendra · 24/12/2007

Muita salude ye l que deseio para todos, l resto sachai-lo que yá sodes grandes.

Almendra

Leonardo Antao · 24/12/2007

Nesta época natalícia, an que se comemora l nascimiento de L Home mais estraordinário de la houmanidade, ye tradiçon relhembrar ls amigos i familiares ban cuontribuindo para l nuosso bien estar i felicidade l lhongo de la nuosa bida.

Nestas circunstánças nun podie deixar de relhembrar, cun muita satisfaçon, todos aqueilhes que cun muito ampenho, muita dedicaçon i un árduo i silencioso trabalho tenan cuontribuido pa l mieu aperfeiçoamento de la cultura i de la scrita de la lhéngua mirandesa, an special Amadeu Ferreira i bários outros partecipantes no cuorso i no Froles Mirandesas, i les desear un Santo i Feliç Natal i, que l Nuobo Anho de 2008, seia cheno de cousas buonas i l melhor de siempre, assi cuomo para todos ls buossos familiares.

Un die un sabio dixe “la riqueza de l home miede-se puls amigos que ten” Muito oubrigado a todos ls partecipantes no Curso i no Froles Mirandesas que tenan benido a cuontribuir para aumentar la mie fertuna.

Este último deseio nun ye para aqueilhes de quien me lhambrei, mas si para aqueilha que you nunca guostarie de fuesse squecida:
Feliz 2008, ... i ls maiores sucessos, pa la nuossa querida lhéngua mirandesa.

Ana Maria F · 24/12/2007

Nun deixarei passar este die i esta nuite máigica cumo la cunsidéran alguns sien desear a todos que por aqui pássan uas Buonas Fiestas de fin d’anho.
Cumbíbamos todos fraternalmente cunsiderando siempre que todos merécen respeito i stima !
I para la Lhéngua Mirandesa, ye absolutamente eigual. Ye cumo se fusse ua pessona tamien. Pessona de stimaçon !
Hai-que cuntinar a falá-la anton, dá-la a cunhecer i ambentar siempre formas de la balorizar.
Un curso cumo este, grácias al trabalho i a la grande dedicaçon de l Porsor Amadeu Ferreira, puso al alcance de todos, cun un sprito mui positibo que falta por bezes a alguns, ua cultura que, ye ua eibidéncia !, nun habie sido até agora nien suficientemente nien siempre corretamente balorizada. Esta ye la mie oupinion ; i mesmo ne l die de Natal me apetece dezir l que penso. Mas nada, absolutamente nada, bai ampedir que fiestas cumo estas seian tamien fiestas para la Lhéngua Mirandesa.
Muita salude anton i felcidade tamien para eilha cumo para todos i todas que la sáben defender i tamien respeitar.

2giga · 25/12/2007

Buonas fiestas a todos i que las malinas d'agora seian brebes momientos de refleçon. Que l Sol torne a brilhar na alma de cada un i mos achegue mais uns als outros.

Abraços i salude para todos

Pedro

alfredo · 26/12/2007

Cumo yá nun bou a tiempo de bos desear Feliç Natal, deixo eiqui ua ouraçon, ua speçe de ua ouraçon, que tanto poude ser de Natal cumo de outro die qualquiera. Pido las palabras amprestadas, yá que las mies rezas me sálen mi ambrulhadas.

KYRIE

An nome de ls que chóran,
De ls que súfren,
De ls que acénden na nuite l fachuco de la rebuolta
I que de nuite se muorren,
Cun sprança ne ls uolhos i arames an buolta.
An nome de ls que suonhan cun palabras
De i paç que nunca fúrun dezidas,
An nome de ls que rézan an silenço
I fálan an silenço
I sténden an silenço las dues manos aflegidas.
An nome de ls que píden an segredo
La smola que ls rebaixa i ls muole
I máçcan las lhágrimas i l miedo
Anquanto la fame les duole.
An nome de ls que drúmen sien eira nien beira
nua cama de chuba cun mantas de bantaneira
l suonho de la miséria terrible i porfundo.
An nome de ls tous filhos que squeciste,
Filho de Dius que nunca más naciste,
Torna outra beç al mundo!

an Pertués

Em nome dos quem,
Dos que sofrem,
Dos que acendem na noite o facho da revolta
E que de noite morrem,
Com esperança nos olhos e arames em volta.
Em nome dos que sonham com palavras
De e paz que nunca foram ditas,
Em nome dos que rezam em silêncio
E falam em silêncio
E estendem em silêncio as duas mãos aflitas.
Em nome dos que pedem em segredo
A esmola que os humilha e os destrói
E devoram as lágrimas e o medo
Quando a fome lhes dói.
Em nome dos que dormem ao relento
Numa cama de chuva com lençóis de vento
O sono da miséria, terrível e profundo.
Em nome dos teus filhos que esqueceste,
Filho de Deus que nunca mais nasceste,
Volta outra vez ao mundo!

José Carlos ARY DOS SANTOS

ramosantao · 28/12/2007

Mensaige

La temporada de Natal, Anho Buono (Nuobo) i até l Die de Reis ye bien farta i inda bien de mensaiges, deseios i muitas palabras de cunsuolo.
Todos l sabemos i nunca ye demais.
A mi gusta-me recebir essas mensaiges i tamien de las dar, quando las recibo son cumo fatilas de pan de fogaça torradas al lhume i untadas cun miel nua manhana frie a pie de l lhume, na Rue de Belharino, quando las dou percuro siempre que séian tan doces cumo estas mas untadas cun cachico de refleçon.
Cumo esta que eiqui deixo.

Se an ti naciu l nino Jasus
Nun tenes nada a temer
L Anho Buono muitos amigos bai a trazer
Que nunca de ti se ban a squecer

Ora, esta ye tamien la purmeira refleçon que fago.
Para m’ajudar a parar un cachico, a pensar ne l bien i ne l mal, i se tengo que cuntinar que seia para melhor. Puis l melhor, l mais de las bezes que deseio als outros, sou you que tengo que l fazer. Stá nas mies manos, solo que inda nun me dei cunta desso.
Assi, se deixar nacer an mi l Nino puro, sien macla, sien rábia, sien ambiçon mala, sien malbadeza, sien perjunçon, stá nacendo un Anho Buono i melhor para todos aqueilhes que cumigo bíben, trabálhan, fálan, stúdan i áman la lhéngua mirandesa.

Anton nada tengo a temer
Porque dende benirá l bien querer para todo l mundo, benirá un anho de felcidade que ye l mais amportante. Benirá la paç, cun eilha mais alegria mais sunrisos i quien sabe mais salude.

Que naça esse Nino an todos nós (homes i mulhieres) son ls mius deseios

nataliantao · 29/12/2007

Buonas fiestas i feliç Anho Nuobo
Que l Anho Nuobo seia melhor do que este.
Que benga, que nun mos falte salude, que haba paç i antre todos.

almendra · 29/12/2007

Salude i paç ye l que mais bos deseio. L resto que cada un faga por el. Ah! i que ajudeis a quien percisar i se bós percisardes, cuntai comigo ne l que you poder.

Abraços

Almendra