amadeu · 04/02/2007

Poner eiqui las repuostas al Eisercício (10) - Bamos a screbir I

Pinheirinho · 05/02/2007

editada dia 05-02-2007 23:35:10 por: Pinheirinho

La rezon que me lheba a anteressar pula lhéngua mirandesa ye la cousa de tener sido la mie purmeira fala. Anquanto stubo na scuola purmária, pudo dezir que fui oupremido pelo porsor, you i todos ls garoticos de l miu tiempo. O porsor era un buono porsor, mui dedicado als alunos, mas dabamos porrada por falar i screbir mirandés. Que me perdonen ls tius i tias de Caçareilhos, mas l Senhor Moreno fui l culpado de se tener perdido la fala de l mirandés alhá. Por bias de cousas de la bida, scapeime de Caçareilhos cun 11 anhos de eidade i cul passar de ls anhos todo se esqueciu. Agora, home, soie como aquel garotico que nos anhos 50 falaba l mirandés. Quiero apurbeitar esta ouportunidade, cun muita fuorça, alegria i carino por la mie purmeira fala, ampeçar de nuobo, cun ganas d´aprander i cula ajuda de ls mius amigos, lhambrando la bida de l campo, atrás de las burricas de mie mai. Cumo ye bono tener lhambranças de la bida de garotico! Se fuora capaç de agarrar aqueilhes tiempos, agora an la nuossa tierra, stou cierto só se falaba l mirandês.

2giga · 06/02/2007

Porque rezon stou a fazer un curso de mirandés ou de cumo ye amportante l mirandés para mi?

Para mie l amportante ye daprender i subretodo tamin difundir.
L curso online naciu de la eideia de L prossor Amadeu i mie, que apuis de tener partcipado nun de ls cursos dados por el, an Sendin, achemos que serie possible alargar l ambito de l "daprender l mirandés" a quim nun l podie fazer por bariadissimas questones.

Serie assie l purmeiro curso na anternet.

La purmeira razon foi que de las poucas classes que stube presente nesse curso, por ampossiblidade de star an todas, achei l curso ua cousa mui, mui anteressante. Digo-bos mesmo que nun staba a spera d'aqueilho que daprendi i de l dinamismo que era difundido puls prossores, Carlos i Amadeu. La purmeira beç que tube cuntacto cun un curso de mirandes, fui na scuola (ciclo) i nun tuobe nada que ber. Apanhou ua altura an que l mirandes nun staba tan na "moda" cumo agora i inda por riba fui eisegido cumo classe oubrigatoria. Claro stá que ua cousa que nun ye de buntade propria nun ten l mismo ampacto de quando se quir mesmo i por esso l antresse que you tenie nun era de daprender cumo l ye agora. Las classes nun eran tan anteressantes i la mie curgidade tamin nó. Por esso la mie admirança cun l que bi i oubi desta beç.

Falou-se de muita cousa: storia de la lhengua, storia de las nuossas tierras, eibuloçones i de la stroria i eibuloçon de l mirandes. Cousas que inda habemos de falar neste curso i que cumo sei que fui anteressante, stou cierto que poner-lo a la çpoziçon de todos quantos quergan an todo l mundo ye l melhor que podemos fazer por la nuossa lhengua, ls nuossos questumes i las nuossas gientes.

adeusdado · 06/02/2007

Dialogo

-Anton Marie, stás anraibada?
-I nun ye pra star? Inda ye perciso ir a regar la huorta i tu ne l Mirandés.
-Pus boute a dezir ua cousa. Esto inda bai dar que falar. Tu ya pansaste que cun l´andar de ls tiempos cada beç haberá menos pessonas cumo nós a falar l Mirandés?
-Pus anton menos razones pal´andares a studar?
-Pus stás anganhada. Ye d´alrobés. Ls tiempos stán a demudar, las pessonas saben muitas cousas, i a la medida que saben mais, mais bontade tenan de saber inda mais. Ya stou a ber ua bilblioteca chena de lhibros, i journales i muitas pessonas puli a lher. Inda bou mais adelantre, bai haber un centro de studos Mirandeses, eiqui miesmo an Miranda.
-You nin te dou respusta a tanto çparate. Las pessonas l que quiran ye denheiro.
-Nin todas!... nin todas…

Válter Deusdado

ramosantao · 06/02/2007

Porque rezon stou a fazer l curso de mirandés?

La mie repuosta ye:

You stou a fazer l curso de mirandés, porque quiero daprender a screbir-lo segun las reglas de la Cumbençon i a falar-lo melhor.
L mirandés fui la mie purmeira lhéngua.
Dantes, quando you daprendi a falar, screbir i studar l pertués, you yá sabie falar l mirandés, mas nunca tube l’ouportunidade de l daprender a screbir, solo quando s’oufecializou i ampeçórun ls cursos.
Culs mius pais, armanos, armana, parientes, bezinos, amigos solo s’ousaba esta fala. Quando jogaba al pion, a la belharda, al arco, a la cunca, quando iba a tomar cunta de la buiada, de l ganado, apanhar menudas, nabiças, quando iba a las matáncias de ls cochinos, a la machorra, a fazer la fogueira, a las fiestas, siempre falaba an mirandés.
L tiempo passou, i buona fui l’hora i l’eideia de l oufecializar, porque assi quedórun las cousas mais fáceles pa l daprender a screbir i tornar a la fala, que yá muito squecida andaba.
Cuido que la maior amportáncia, ye que l mirandés cumo lhéngua ye un balor cultural dun pobo i que quier deixá-lo cumo hardança a este Paiç. Solo l puode fazer se fur bien screbido i pulas pessonas falado.
Se you cumo mirandés nun l daprendir quien bou a querer que l daprenda?

Tonux · 09/02/2007

editada dia 09-02-2007 13:08:46 por: Tonux

editada dia 09-02-2007 13:05:10 por: Tonux

You stou eiqui daprendendo la lhéngua mirandesa, puis pienso que ye mui amportante coincer la cultura de l pobo de l miu Paiç. Ye amportante dibulga-la para que nun çpareça. Faç parte dun rico patrimoino cultural que debemos cunserbar.
Por outro lhado, raízes lhigan-me a este grande Nordeste Transmuntano, i you sinto-me, tamién, un cachico mirandés. Graças a estas liciones tan bien menistradas, you sei l que sei. Deseio deixar eiqui, más ua beç, la mie admiraçon pul trabalho de lhebar als antressados la lhéngua screbida i falada.
Un abraço al porsor Amadeu pula sue dedicaçon i antresse.

Salude a todos.

Tonux

Antonho Lobron · 10/02/2007

editada dia 10-02-2007 18:31:58 por: Antonho Lobron

Rezones para fazer un curso de mirandés.

Çcodrinar ls racondidos de mi, çtapar ls registros que oubi, scuitar las

palabricas sonidas a çtancia de tantos anhos, cançones d’ambalar, lhonas i

cuontas al redor del puial, a soleira de la puorta, bozieiros al fin de tarde i

daprender a dezir i a screbir un mirandês yé bolber a ser nino.

Ambora la mi purmeira lhéngua seia l portues, alguas augueiras chegorun,

ainda an nino, i s`antranharan nas mies benas i çpertaran l anteresse por

daprender a dezir cousas an mirandés i a screbi-las.

10Fev07
Antonho Lobron

Ana Maria F · 11/02/2007

editada dia 11-02-2007 23:04:52 por: Ana Maria F

Prosa, i tamien un pouco de poesie...

Nien sequiera tenie cinco anhos
quando nun die de Nobembre
(Iba a ampeçar l´Eimbierno...),
quedou pa trás l'aldé
i la casa pequeinha
adonde bira antretanto la luç pula purmeira beç...
Quedórun para trás tamien
dua cierta maneira
la lhéngua i la cultura
que zde seclos prubablemente
tenien sido cumo ua família.
Família grande,
Giente sien cunta,
L’Ouniberso todo...
L Mundo que nun ten fin...

Passórun anhos,
anhos i mais anhos
i la raíç nunca se secou...
Que flores, flores mirandesas,
poderan dar inda un die
essas raízes...?
Raízes eiternas,
Cumo las Arribas,
Cumo l sol tamien
Que nace todos ls dies...

Nien sequiera tenie cinco anhos,
quando nun die de Nobembre...

Lhebei raízes i lhebei flores,
Lhebei suonhos...
I Lhebei-te a ti tamien, Lhéngua Mirandesa!

Lhebei raízes i llhebei flores,
Lhebei suonhos...
I Lhebei-te a ti tamien…

Ampeçou ua nuoba bida
nesse die de Nobembre.
I passórun muitos anhos...
Las flores, adonde stan?
Anté la palabra “flor”...
parece que se diç doutra maneira!...

nataliantao · 11/02/2007

PORQUE REZON STOU A FAZER L CURSO DE MIRANDÉS

Sendo l mirandés la segunda lhéngua oufecial, ye muito amportante daprende-la, i saber siempre mais subre to la sue ourige, sue stória i sues tradiçones. Daprender ye siempre aumentar l miu coincimiento. Por esso stou a fazer l curso de mirandés para saber mais subre la lhéngua que yá José Leite de Vasconcellos tanto balorizou.
Al mesmo tiempo que bou screbindo tento dezir las palabras para melhor la falar, pus nun sendo you mirandesa, tengo mais deficuldade nesse campo. To las pessonas an giral deberien daprender un cachico de mirandés.
You quiero saber mais.

FONTE DO GIL · 11/02/2007

Coincie la lhéngua mirandesa quando yó tenie uito ou nuôbe anhos i quedaba ancantada mentes oubia las pessonas cumbersaren entre eilhas, ambora yó nun antidise naidie, mas como yó nunca tenie oubido outra lhéngua a nun ser la portuesa que se falaba dan la mie aldé, esto para min fuie ua grande nobedade.
Pur aqueilhe tiempo ls mirandeses yerun cuincidos pelos”palhantres” puorque na beç de deziren “para diante” dezien palantre, daí l´alcunha de palhantre.
Cumo yó siempre gustei daprender algo mais i porque la lhéngua mirandesa siempre me diç algo eis porque máncontro a estudiá-la. Stou inda mui cruda, mas cul tiempo i cun ls buonos porssores que tengo, alhá chegarei.

amadeu · 19/02/2007

Eisercício (10) - Bamos a screbir I – Nota final

Fúrun nuobe las pessonas que quejírun respunder a este eisercício de scrita, apuntando rezones para la sue partecipaçon neste curso de lhéngua mirandesa. L mais deilhas yá tubírun algue ligaçon cul mirandés lhougo zde pequeinhas; outras, anque nun séian mirandesas, tamien tubírun ligaçon cula lhéngua mirandesa ou porque fúrun a bibir para tierras de Miranda ou porque se casórun cun mirandeses; mas tamien aparece a respunder quien nun seia mirandés i steia eiqui solo pula fuorça que sal de la cultura que mos eidentefica, tamien cumo pertueses i stramuntanos.

Todos ls testos, cada un a la sue maneira, son mui sentidos i alguns stan mui bien screbidos. Doutros sal mesmo un cierto drama dua lhéngua que se fui oubrigado a deixar cun poucos anhos i que agora se quier fazer la puonte cun esse tiempo, cumo quien bai a saber dun cacho del mesmo que un die quedou perdido nua squinica de l tiempo.

Todas las rezones apuntadas son mui bálidas. Outras rezones teneran outras pessonas que síguen l nuosso curso, inda que nun las téngan screbido.

Anque falando muita beç de l antigamente, todos ls testos míran palantre, pa l feturo i pa la prática de la lhéngua ne ls dies de hoije. I esso ye l mais amportante, porque ye l ampeinho que tenemos cun ua lhéngua biba, que bibe por bias de las pessonas i pa las pessonas.

Bamos a cuntinar l nuosso curso, cun ua passada serena cumo mos aperponimos, traiendo siempre l que puode correspunder al que las pessonas spéran. Cumo tal, tamien las liciones de stória i cultura mos ban a acupar mais tiempo de agora an delantre, mas cada cousa a sou tiempo, que nun puode ser todo a la par.

Agora bou-le a debolber a cada ua/un – pa la sue caixa de correio eiletrónico - l sou testo cun las correçones de scrita, se fur l causo.

Qualquiera die yá bamos a tornar a ua nuoba spriéncia de scrita.

19 de Febreiro de 2007

Amadeu Ferreira