001. La lhéngua mirandesa apersenta-se

editada dia 17-09-2006 0:39:11 por: amadeu

001. La lhéngua mirandesa apersenta-se

Ne l ampeço dua classe, las pessonas ampéçan por s’apersentar uas a las outras. Neste curso las pessonas ban-se apersentando ne l forum L Sagrado. Esso nun quier dezir que quédemos a coincer bien essas pessonas, mas dá para tener un purmeiro retrato. Assi i todo, anque seia coincida de todos, ua pessona ten un belhete de eidentidade que apersenta un retrato i çclara un manhuço de algues caratelísticas que la puoden çtinguir de las outras, anque séian caratelísticas de fuora i nada mos dígan quanto al fondo dessa pessona.

Tal i qual cumo pa las pessonas, tamien podemos apersentar l belhete de eidentidade dua lhéngua, que mos deia las purmeiras anformaçones subre la sue parte de fuora yá que la sue armaçon nun puode relhumbrar nesse retrato i solo eirá quedando mais defenhida al modo que báiamos andando ne l nuosso curso.

Eiqui queda l que puode ser l belhete de eidentidade de la lhéngua mirandesa.

Nome – mirandés.

Filiaçon – lhatin.

Família - lhénguas stur-lheonesas.

Parentena – Lhénguas románicas, an special l pertués i l castelhano.

Era de nacimiento – hai alredror de mil anhos.

Morada – 30 aldés de l cunceilho de Miranda de l Douro i 3 aldés de cunceilho de Bumioso, çtrito de Bergança, Pertual, Ounion Ouropeia; fui-se pul mundo culs mirandeses que son benediços noutras tierras, falando-se hoije an buonos juntouros nas percipales cidades de Pertual, subretodo Lisboua i Porto, i tamien an outras partes de l mundo adonde chegórun ls mirandeses. Talbeç este curso mos ajude a saber por adonde ándan alguns deilhes.

Nacion – Pertual, paíç de l’Ounion Ouropeia. La lei nº 7/99, de 29 de Janeiro, de la Assemblé de la República, çclarou ls dreitos de la quemunidade de falantes de lhéngua mirandesa.

Modo de se screbir – cunsante la Cumbençon Outográfica de la Lhéngua Mirandesa (1999) i sue Purmeira Adenda (2000) que se puoden achar an www.mirandes.no.sapo.pt i www.sendim.net

Purmeira beç que fui apersentada al público, cumo lhéngua – 1882, por José Leite de Vasconcellos. Até ende bibiu solo cumo lhéngua oural, anque algo deilha yá se ache an decumientos de ls seclos XII-XIV.

Ansino – ansinada oufecialmente, por scuolha, nas scuolas de l cunceilho de Miranda de l Douro zde 1985/86, na UTAD (Ounibersidade de Trás ls Montes i Alto Douro), i tamien, zde 2001, an cursos dados pula Associaçon de Lhéngua Mirandesa, na region de Lisboua, i an outros cursos que ténen sido ourganizados. Agora ye tamien ansinada pula anternete, por bias deste curso. Nesta altura (2006-2007) l ansino oufecial agarra todas las classes zde la la pré-purmária até al 12º anho.

Ferramientas – «Convenção Ortográfica da Língua Mirandesa» i   «Primeira Adenda à Convenção Ortográfica da Língua Mirandesa», yá faladas; «Pequeno Vocabulário de Mirandês-Português», de Moisés Pires (2004) i «Dicionário Mirandês-Português», de Amadeu Ferreira e José Pedro Cardona Ferreira, an publicaçon an www.bragancanet.pt/dicmirandes, www.mirandes.net i www.sendim.net; gramática screbida por José Leite de Vasconcellos an 1900 (Estudos de Philologia Mirandesa, vol. I); lhiteratura que ampeçou yá ne l seclo XIX i hoije ye acrecentada to ls anhos cul salimiento de lhibros de poesie, quelóquios, cuontas, crónicas i traduçones; jornales que sálen a cada sumana cumo l Jornal Nordeste, zde 2003, i a cada més ne l jornal Público, zde Setembre de 2005, jornales de las scuolas i jornales birtuales cumo www.diariodetrasosmontes.com i an bários sítios de l’anternete.

Falantes – nun se sabe bien al cierto quantos son, mas andaran por 7 000, talbeç algo mais, cuntando ls que bíben na region de Miranda i fuora deilha.

Salude – andeble, sendo cunsidrada ua lhéngua an risco.

Prázio de balidade – sin prázio, até que ls mirandeses quérgan.

Queda, assi, apersentada la lhéngua mirandesa. Als poucos bamos-la a çcubrir melhor, que todo lhieba sou tiempo i hai que tener pacéncia, até porque las lhénguas son siempre cousas mui cumplicadas. Dúbedas i, talbeç, eideias defrentes nun seran porblema, yá que todo poderá ser çcutido i çclarado. L curso será todo screbido an mirandés, i serie buono que to la giente que querga partecipar scriba tamien an mirandés, sien miedo de dar erros, yá que nun hai outro modo de daprender. Mas nun se puode oubrigar a naide i tamien ende se puode ir als poucos.

14 de Setembre de 2006

Amadeu Ferreira