003. Adonde se fala mirandés

003. Adonde se fala mirandés?

Para quien nun saba adonde queda Miranda de l Douro, hai que le dar las seguintes cordenadas:

Cuntinente – Ouropa

Paíç – Pertual

Region de Pertual: cantico nordeste, mesmo junto a la raia cun Sapanha, ne l sítio adonde l riu Douro entra an Pertual, fazendo frunteira culas porbíncias spanholas de Çamora i de Salamanca, cumo se bei puls mapas an aneixo, zenhados pul giógrafo Carlos Ferreira.

La repuosta dada a la pregunta que ponemos arriba, inda que pareça simples, nun ten sido siempre la mesma. Bamos a deixar eiqui las repuostas que ténen sido dadas puls bários outores.

José Leite de Vasconcelos

Este outor, a quien se dében ls purmeiros studos subre l mirandés i de que falaremos mais tarde, publicou ua purmeira lista de lhugares adonde se falaba mirandés. Essa lista fui ourganizada cun assento nas anformaçones que le fúrun ambiadas an 1898 pul Padre José Bernardo de Moraes Calado, padre de Miranda de l Douro, que se las habie pedido als padres de las aldés. La lista stá publicada ne l sou lhibro Estudos de Philologia Mirandesa (1900-1901), i ten ls seguintes lhugares:

- ne l cunceilho de Miranda de l Douro: Custantin, Cicuiro, San Martino de Angueira, Pruoba, Infainç, Paradela, Zenízio, Speciosa, Malhadas, Aldé Nuoba, Bal d’Aila, Palancar, Peinha Branca, San Pedro de la Silva, Fuonte Lhadron, Granja, Dues Eigreijas, Cérceno, Palaçuolo, Prado Gaton, Augas Bibas, Bila Chana, Freixenosa, Fuonte Aldé, Picuote i Sendin;

- ne l cunceilho de Bumioso: Angueira, Caçareilhos e Bilasseco.

Nun se fala de las pequeinhas quintas, talbeç porque tubíran mui pouquitas pessonas.

António Maria. Mourinho

Ne l sou studo Diversidades Subdialectais do Mirandês (1958), manten la mesma lista de José Leite de Vasconcelos, mas acrecenta-le Bal de Mira. Nun studo que publicou alguns anhos apuis cuncluiu que yá nun se falaba mirandés an Caçareilhos, pus se haberie ende perdido la fala ne ls redadeiros anhos.

Convenção Ortográfica da Língua Mirandesa (1999)

An mapa ende publicado culas tierras adonde se fala l mirandés, manten la lista de José Leite de Vasconcelos, mas tira-le Caçareilhos, cunsante l’oupenion de António Mourinho.

Manuela Barros Ferreira

Nun studo que publicou an 2001 (A situação actual da língua mirandesa e o problema da delimitação histórica dos dialectos asturo-leoneses em Portugal), abança cun mais un lhugar pa la lista. Son estas las palabras daqueilha eilustre ambestigadora i dibulgadora de l mirandés: “... Miranda do Douro, não costuma aparecer na lista de localidades de fala mirandesa porque aí a língua nativa foi submergida pelo português, ... No entanto, ultimamente, com a concentração de gente que vai trocando a aldeia pela cidade, e com o movimento que ali surgiu a favor da língua local, o mirandês começou a ser um pouco menos evitado na própria cidade de Miranda. Por essa razão, creio ter chegado o momento de se reintegrar a capital do concelho no mapa da língua mirandesa.”

Carlos Ferreira

Na sue tese Toponímia, Paisagem e Ambiente, uma abordagem geotoponímica de Sendim em terra de Miranda (2003), seguindo la mesma ourientaçon de Manuela Barros Ferreira, mete na lista mais ua tierra, l Barrocal de l Douro. Mas bai mais loinge, tornando a meter Caçareilhos antre las tierras de fala mirandesa.

Que dezir de todo esto?

Ua purmeira ouserbaçon ye que naide mete na lista ls lhugares que quédan fuora de la tierra de Miranda i para adonde ls mirandeses eimigrórun, seia ne l paíç, seia ne l strangeiro. La berdade ye que, por bias de l’eimigraçon anterna i sterna, la lhéngua mirandesa acumpanhou ls mirandeses pul mundo. Nuns sítios mais que noutros hai quemunidades de mirandeses, cuntinando a ousar-se an muitos casos la lhéngua mirandesa. Por mi, cuido que esses mirandeses nun puoden ser deixados de fuora i hai que cuntar cun eilhes.

La facelidade cun las pessonas puoden andar dun lhado pa l outro bieno a poner nuobos porblemas an relaçon a tierras an que, storicamente, nun se puode dezir que siempre hában sido de fala mirandesa. Que critério seguir nestes casos? Por mi cuido que ye de seguir l’oupenion de Manuela Barros Ferreira: ls sítios adonde se passou a falar mirandés, inda que seia por pessonas benidas de fuora i por un grupo inda pequeinho, ténen de ser metidos ne l mapa de la lhéngua mirandesa. Esto bal tanto pa las tierras que perténcen a la region de Miranda, cumo pa las tierras que stan fuora deilha, seia an Pertual, seia ne l strangeiro.

Yá l caso de Caçareilhos ye defrente. Inda que la lhéngua nun seia ousada ne l die a die, la berdade ye que bárias pessonas mos puoden cuntinar a falar an mirandés, se mos achegarmos a la fala cun eilhas nessa lhéngua. Isso mesmo se passou cumigo ne l berano de 2001. Mais tarde, yá an 2004, bin a coincer pessoas dessa tierra que siempre tubírun l mirandés cumo la sue fala percipal, tenendo grabaçones de cumbersas, tanto feitas por mi cumo por outras pessonas. Por todo esso, cuido que ye cedo para botar a Caçareilhos para fuora de l mapa de l mirandés. Hai que deixar que la stória se baia fazendo i nun hai que l’apressiar. Ls lhaços de Caçareilhos cul mirandés inda alhá stan, anque mui andebles. Quien sabe se nun poderan serbir para atar cun eilhes algun renacimiento de l mirandés, anque lhemitado? L que se passou an Caçareilhes ye até un caso de studo, que nunca se fizo, subre l cumo i porquei se fui ende perdendo la lhéngua mais do que ne ls outros lhados.

Mapa de ls lhugares adonde se fala mirandés

Apuis de l que se dixo arriba, queda an aneixo l mapa de ls lhugares de la region de Miranda adonde se fala mirandés, yá que las outras tierras adonde se fala mirandés, séian an Pertual ou ne l strangeiro, inda nun hai cundiçones para las assentar cumo debe de ser. L mapa na aneixo, fui tamien zenhado pul giógrafo Carlos Ferreira.

21 de Setembre de 2006

Amadeu Ferreira