A – Yá oubistes falar ne l Daguinaldo?
B – Daguinaldo? You cuido que yá oubi falar, mas nun sei l que ye. Eiqui Fracisco ye capaç de saber.
F – Nó, tamien nun sei bien l que ye. Solo sei que ten a ber cul Anho Nuobo, algo aparecido culs Reis.
A – Si, ye aparecido culs Reis, mas ye algo defrente. Era ua tradiçon mui antiga de las tierras de Miranda. Cuido que inda s’usa pa ls lhados de la raia. L die de Anho Buono, ls afelhados íban an casa de ls padrinos lhougo a la purmanhana bien cedo. Ende deseában-le las buonas fiestas i dezien mais ou menos assi:
Dius mos deia buonos dies i Buonas Fiestas, salidas d`anho bielho i antrada d`anho nuobo, corporales i spirituales, de la buossa bida i toda la buossa família i de quien bós más deseais! I agora dai-me l Daguinaldo!
B – Mira que angraçado. I porque tenie de ser assi tan cedo.
A – Dízen que l Daguinaldo tenie de ser pedido antes de ls padrinos habéren salido a la rue a fazer las sues necidades.
F – Essa ye buona! Anton agora ls padrinos yá nun percísan de salir a rue pa fazer las necidades, que yá ténen quarto de banho an casa.
B – Bien bisto, nun habie pensado nessa. Si, i apuis l Daguinaldo l que era?
A – Podie ser ua chouriça, nuozes, figos, meligranas, caramelos i cousas assi de comer, que nun se tenien a todos ls dies.
B – Anton era ua questume a modo l Die de Reis, só que era ne l Anho Nuobo.
F – Si, mas nun era para todo mundo, mas solo de ls padrinos pa ls afelhados. I pul que beio, tamien nun se cantába cumo ne l die de Reis.
A – Sabeis, you tamien nun coincie esta tradiçon. Quien me la cuntou fui Duarte Martinç, un de ls porsores de Mirandés, que ye de Malhadas. Dixo-me que la çcubriu pa ls lhados de la Raia.
Mas apuis li un decumiento screbido an 1927 por un tiu de Caçareilhos, chamado Clemente Mondragão, i que inda nun stá publicado. Esse decumiento cunta las cousas doutra maneira. Diç assi:
«Neste dia de Natal, bem como no dia do Ano Bom, é costume invariavelmente geral, exceptuados unicamente aqueles que tiveram a infelicidade de não matar porco, fazer consistir a primeira refeição, o almoço, no caldo de botilho, orelheira, salpicão, linguiças, e pé de porco. A este menú de almoço em dia de Ano Bom ou primeiro de janeiro é-lhe dado o nome de “Daguinaldo”: e quando qualquer criatura entra, na manhã desse dia, em casa de qualquer vizinho, depois de dar os bons dias vai dizendo logo a quem está: - Anton, dais de l daguinaldo?»
B – Mira que cousa mais antressante!
16 de Dezembre de 2006
Amadeu Ferreira
