014 – Abinturas de Asterix: las percipales figuras
2giga · 22 de márcio de 2007 · Curso de lhéngua mirandesa (1º Anho)
014 – Abinturas de Asterix: las percipales figuras
A - Cumo todo mundo sabe, acaba de ser traduzida para mirandés mais ua abintura de Asterix, que se chama L GALATON. Yá a la benda i era buono que toda la giente l mercasse para ler i para oufrecer als amigos. Se fur un éisito cumo l purmeiro, talbeç inda béngamos a traduzir un terceiro.
B - Cumo se chama, an mirandés, la purmeira abintura que fui traduzida, yá l outranho?
F - Anton yá nun se te lhembra? Era ASTERIX L GOULÉS.
B - Á, pus era, i bien que me fartei de dar risadas. I se apersentássemos pa ls alunos de l nuosso curso l’antrada de todas las abinturas, que fala de las percipales figuras?
A - Buona eideia. Anton ampeça tu, por Asterix.
B - Asterix, l heirói destas abinturas. Pequeinho guerreiro, guicho i fino cumo las streilhas, dan-le siempre las missiones mais peligrosas. La fuorça subre-houmana d’Asterix ben de la pocion mágica de l druida Panoramix...
F - Oubelix ye l amigo anseparable d’Asterix. Ye acarreador de menhires i gusta muito de chicha de cochino muntés. Oubelix stá siempre pronto a deixar todo para ir atrás de l sou amigo an nuobas abinturas. Çque haba cochinos munteses i porrada a ringalheira.
A - Panoramix, l respeitable druida de l’aldé, apanha bizgo i porpara las pociones mágicas. La sue maior ambençon ye la pocion (mágica) que dá ua fuorça subre-houmana a quien la bebe. Mas Panoramix ten outras receitas an reserba.
B - Cantadorix, ye l bardo. Las oupeniones subre l sou jeito barían: el cuida que ye un génio, mas todo mundo acha que el ye un çprézio. Quando stá calhado, ye un bun cumpanheiro, de que até se gusta...
F - Regidorix, ye l maioral de la tribo. Pimpon, baliente i çcunfiado, l bielho guerreiro ye respeitado puls sous homes i temido puls sous einemigos. Regidorix solo ten miedo dua cousa: que l cielo le caia an riba la cabeça mas, ye cumo el diç, “Manhana nun será la biespera desse die!”
A - Cumo quédan apersentadas las percipales figuras destas abinturas, pa la próssima licion podiemos ler eiqui un cachico de cada ua de las abinturas que yá fúrun traduzidas. Que achais?
B - Buona eideia.
F - Queda anton treminado.
Amadeu Febereiro
20 de Febreiro de 2007
