018 – Lindainas para çtrabar la lhéngua
2giga · 2 de maio de 2007 · Curso de lhéngua mirandesa (1º Anho)
018 – Lindainas para çtrabar la lhéngua
A - Ua buona maneira de daprender cachicos dua lhéngua ye daprender de cor ditos, cantigas i lindainas nessa lhéngua. Hoije bamos-bos a ansinar alguas dessas lindainas i ditos para çtrabar la lhéngua. Até nós mos bamos a anganhar se calha, ides a ber! Sabes algun á Bina?
B - Sei aquel que diç assi:
You sei un nial
de mafalagrifa
cun cinco mafalagrificos;
you iba pa se ls tirar
mas la mafalagrifa
querie-me amafalagrifar .
A – You bou a dezir mais debrebe:
You sei un niu
de mafalagrifa
cun cinco mafalagrificos;
you iba pa se ls tirar
mas la mafalagrifa
querie-me amafalagrifar.
Á Fracisco, inda sabes dezir de l’outra maneira
F - Esse dito inda se puode dezir doutro modo. Ye assi:
You sei un niu
de mafagafa
cun cinco mafagaficos;
you iba pa se ls tirar
mas la mafagafa
querie-me amafagafar.
B - I aquel de las trés Pitas? Quereis saber cumo ye?
F – Diç alhá.
B - Trés pitas coixas
cómen nua pila,
cuorre la pita coixa
trás la coixa pita.
A – I esto agora diç-se muita beç debrebe:
Trés pitas coixas
cómen nua pila
cuorre la pita coixa
trás la coixa pita.
F – Anton mirai cumo era un que se me lhembra de dezir quando era garotico:
Trás daqueilha sebe seca
comi miel de mielra seca
(dezir muita beç i debrebe)
Trás daqueilha sebe seca
comi miel de mielra seca
B – Mira que you nun me atrás. Mira este:
Este alqueire de nuozes
Bien arrasado stá,
Quien lo arrasou
El l zarrasará
A - Este alqueire de nuozes
Bien arrasado stá
Quien lo arrasou
El l zarrasará.
Esto debrebe ye cumplicado.
F – Anton you tamien nun me quedo. Ende bai:
Ancalcar alhos nua cesta
Ancalcar alhos nua cesta
A – Anton diç mais debrebe.
F - Ancalcar alhos nua cesta
Ancalcar alhos nua cesta
A – Si sabeis bien deilhes. Mirai anton este de quando you era garotico:
Cerrubico, bico, bico,
Quien te dou tamanho bico?
La comadre de la portielha
Que rumpiu la sabanielha
Sabanielha rial
Pica la cal
La cal menuda
Pica la cuba
La cuba de barro
Pica l cabalho
L cabalho mourisco
Pica l bispo
l bispo de Roma
Tira la corona
Que nun te la beia
La cunca rabona.
I inda bou a acabar cun outro, que diç assi:
Miu pai ten ua parra
No meio de la binha, sola;
Miu pai poda la parra
Miu pai la parra poda.
Miu pai ten ua parra
No meio de la binha, sola;
Miu pai poda la parra
Miu pai la parra poda.
Dezir debrebe ye mais cumplicado
07 de Márcio de 2007
Amadeu Ferreira
http://www.youtube.com/v/f8G70sGIO80
