Eisercício (4) cun poema andrento
amadeu · 28 de nobembre de 2006 · Curso de lhéngua mirandesa (1º Anho)
Eisercício (4) cun poema andrento
L poema que stá abaixo fui screbido por un de ls mais grandes poetas mirandeses, l padre Manuel Preto (Bersos Mirandeses, Edições Salesianas, 1993). Manuel Preto naciu an San Martino a 20 de Dezembre de 1914, fui missionairo salesiano por muito lhado, cumo Moçambique i Timor, sítios por adonde screbiu ls sous bersos, i tubo l sou findamiento l 10 de Janeiro de 1983.
Quando estes bersos salírun inda nun habie la Cumbençon Ourtográfica de la Lhéngua Mirandesa i, por esso, fúrun screbidos dun modo çfrente de l que esse decumiento mos ansina. Para alhá de ampeçar a coincer un amportante poeta mirandés, l zafio que eiqui bos deixo ye poner l testo cula scrita al modo de la Cumbençon Ourtográfica de la Lhéngua Mirandesa. Algues cousas, poucas, yá you las pus al modo, para que cada ua/un tenga solo que ousar l que daprendiu culas liciones dadas até agora.
Deixo dues chamadas de atençon: ls ditongos crecientes stan screbidos cun assento circunflexo (^); l artigo defenido masculino tamien stá screbido dun modo special an relaçon al que daprendimos. Qualquiera dúbeda ye solo preguntar.
La voz de Miranda
Iou num sou iou.
Chamo-me Manuel, mas num sou Manuel;
Num me chamo Marê, mas sou tamên Marê.
Ponírun-me um nome, mas som todos l's nomes
De l's homes e de las mulhêres .
De la squina de l'Nordeste.
Sou la voz de la têrra an que naci e me criei!
Toda la tristeza
De la gente mirandesa
Iê mar que m'antrou n'alma
E me roubou la calma
Sêm modo nêm lei!
Mar que fizo de mi um campo de batalha,
E anda cumigo a las vôltas
Por caminos e atalhos que nêm sei!
- Gritos que crécen,
E de tanto gritar desfalhécen,
Óndias que van, óndeas que vénen!
A que me cumpararei?
Sou la voz de Miranda
(Cumo um pobrezico, roto, môrto, sfameado,
Que pide um cacho de pan, um palheiro, ua croua)
A gritar para Lisboa:
Á que dal rei! A que dal Rei!
Manuel Preto
La correçon deste eisercício será publicada l die 3 de Dezembre a la nuite.
28 de Nobembre de 2006
Amadeu Ferreira
