Eisercício (9) – scritas que demúdan - resoluçon

Eisercício (9) – scritas que demúdan - resoluçon

Apuis de, an eisercício atrasado, habermos coincido la scrita de l poeta mirandés Manuel Preto, quedemos agora a coincer outro amportante scritor, Bernardo Fernandes Monteiro. L testo publicado por Trindade Coelho nun stou cierto que corresponda anteiramente al de l scritor de la Pruoba, yá que fui copiado dun caderno screbido a la mano i ye possible que tenga sido copiado cun erros.

Para que todo seia mais claro, deixo las eimendas antre parénteses retos[].

De sôrte [suorte] que dixiru [dezírun] antre ls fariseus:

- Bedes bós que nada apurbeitamos [aporbeitamos]? Eis [esta palabra nun ye ousada an mirandés] alli [alhi] bái [bai] atraz [atrás] d’el [del] todo el [l] mundo!

Ora habiê [habie] alguns gentius d’aqueilhes [daqueilhes] que teniẽ [tenien] benido adorar a Dius ne die d’la [de la] fiêsta [fiesta].

Estes puis s’ancaminorũ [s’ancaminórun] a Felipe, qu’era de Bethsaida d’la [de la] Galiléa [Galileia], e [i] le fazirũ [fazírun] esta rogatiba, dizendo [dezindo]:

- Senhor, nós quijiramos [quejíramos. Mas l tiempo mais cierto serie «queriemos» ou «queremos»] ber a Jasus.

Biêno [bieno] Felipe [a] dizi-lu [dezi-lo] a Andrés: anton Andrés e [i] Filipe [Felipe] le dixiru [dezírun] a Jasus.

E [I] Jasus les [le] respondiu [respundiu], dezindo:

- Yê [Ye] chegada la hora an que el [l] filho de l’ [de l] home será crucificado [curceficado]. Am [An] berdade bus [bos] digo, que se el [l] grano de trigo, que cai na tiêrra [tierra], nũ [nun] morrir, queda el sólu [solo]; mas s’el morrir, purduz [porduç] muito fruito. El [L] qu’ama la suê [sue] bida, perdera-l’a [perderá-la], e [i] el [l] qu’aborrece la suê [sue] bida n’este [neste] mundo, conserbara-l’a [cunserbará-la] pa la bida eiterna.

[Eibangeilho de San Juan, Cap. XII, 19-25

Traduçon de Bernardo Fernandes Monteiro

Publicado por Trindade Coelho an O Reporter nº 1510, de 3 de Janeiro de 1897]

Notas al testo deste eisercício:

1. Ana Maria Fernandes puso algues questiones subre la traduçon, i fizo bien. Ye berdade que se puoden poner essas i outras questiones. Bou a deixar eiqui outros dous testos para quien quejir studar un cachico mais la traduçon.

2. L purmeiro stá an pertués i ye l testo adonde assenta la traduçon de Bernardo Fernandes Monteiro. Trata-se de l testo de la traduçon de la Bíblia feita pul Padre Antonio Pereira de Figueiredo, an 1842, i que era la sola traduçon de la Bíblia çponible an pertués, quando Bernardo Fernandes Monteiro fizo la sue traduçon. Diç assi, cunsante l’eidiçon [de 1928] que you tengo dessa Bíblia:

De sorte que disseram entre si os fariseus: Vêdes vós que nada aproveitamos? Eis ahi vae após elle todo o mundo.

Ora havia alguns gentios d’aqueles que tinham vindo adorar a Deus no dia da festa. Este pois se encaminharam a Philippe, que era de Bethsaida da Galiléa, e lhe fizeram esta rogativa, dizendo: Senhor, nós quizeramos ver Jesus.

Veiu Philippe dizel-o a André; então André e Philippe o disseram a Jesus. E Jesus lhes respondeu dizendo: É chegada a hora em que o Filho do homem será glorificado. Em verdade, em verdade vos digo, que se o grão de trigo, que cae na terra, não morrer, fica elle só; mas se elle morrer, produz muito fructo. O que ama a sua vida, perdel-a-ha; e o que aborrece a sua vida n’este mundo, conserval-a-ha paraa   vida eterna.

Acumparando ls dous testos, nun será defícele de cuncluir cumo la traduçon de Bernardo Fernandes Monteiro stá, an muitas partes, agarrada al testo pertués.

3. L segundo testo que bos deixo ye sacado de la traduçon cumpleta de Ls Quatro Eibangeilhos que you mesmo fiç i acabei an 2004, i de que inda solo fúrun publicados alguns cachos ne l jornal Mensageiro de Bragança. La mie traduçon assenta ne l testo, an lhatin, de la Nova Vugata [cumo l griego - lhéngua an que fúrun screbidos Ls Quatro Eibangeilhos - que sei nun chegaba, traduzi de l lhatin]:

Anton, ls fariseus dezírun uns pa ls outros: «Bedes cumo nun adelantrais nada? Mirai cumo todo mundo bai atrás del!».

Ne l meio de ls que habien ido a rezar l die de fiesta, stában alguns griegos. Estes fúrun-se a tener cun Felipe, que era de Betsaida de la Galileia, i pedírun-le: «Senhor, queremos ber a Jasus».

Felipe agarrou i fui-se-lo a dezir a Andrés. Anton, Andrés i Felipe dezírun-se-lo a Jasus. I Jasus respundiu-le, dezindo: «Chegou la hora an que l Filho de l home bai a ser gloreficado. Quedai bien ciertos de l que bos digo: se l grano de trigo que cair a la tierra nun se morrir, quedará el solo; mas se se morrir, dará muito fruito. Quien stá mui acupado cula sue bida, perderá-la; i quien, neste mundo, aborrecir la sue bida, guardará-la pa la bida eiterna».

28 de Janeiro de 2007

Amadeu Ferreira