Eisercício - ampeçar 005 - Resoluçon
amadeu · 18 de nobembre de 2007 · CURSO DE MIRANDÉS de l SAL – 2º ANHO
Eisercício – amperçar 005 - Resoluçon
Cumo puode ber-se, la scrita de Bernardo Fernandes Monteiro yá era mui acerca de la nuossa. Hai palabras que nun ténen a ber cul modo de screbir mas cun defréncias de bocabulairo i ende hai que las deixar quedar.
Beio que l mais de la giente nuoba que s’anscrebiu ne l curso cuntina cun miedo de respunder als eisercícios que son feitos para eilhes. Que se passa?
Bi agora que me squeci de poner ua data para respunder al eisercício. Mas nun amporta, que quien quejir inda puode respunder.
Eiqui queda la mie resoluçon:
Tenendo puis nacido Jesus an Belen de Judá, an tiempo de l rei Harodes, beíirun de l ouriente uns magos a Jerusalen dezindo:
- Onde stá l Rei de ls judius, que ye nacido, por que nós bimos n’ouriente la sue streilha, i benimos a adorá-lo?
I l rei Harodes, oubindo isto, se turbou, i toda Jerusalen cun el. I chamando ls príncepes de ls saçardotes, i ls scribas de l pobo, le perguntaba onde habie de nacer l Christo. I eilhes le dexirun:
- An Belen de Judá: porqu’ assi stá screbido pul porfeta: - I tu Belen, tierra de Judá, nun sós la de menos cunsidracion antre las principales de Judá, porque de ti salirá l cundutor qu’ha de comandar l miu pobo de Eisrael.
Anton Harodes, tenendo chamado secrietamente ls magos, andagou déilhes cun todo l cuidado, que tiempo habie que le aparecira la streilha. I ambiando-los a Belen, dixo-le:
- Ide i anformai-bos bien que nino ye esse: i depuis que l houbirdes achado, beni-me-lo dezir pra you ir tamien adorá-lo.
Eilhes tenendo oubido las palabras de l rei, partirun; i lhougo la streilha, que tenien bido n’ouriente, le apareciu, indo adelantre deilhes, até que, chegando, parou suobre onde staba l nino. I quando eilhes bírun la streilha, fui altamente grande l prazer que sentírun.
I antrando na casa, achórun l nino cun Marie sue mai, i abaixando-se até l chano l adorórun: i abrindo ls sous cofres, le fazírun sues oufiertas d’ouro, ansenso i mirra.
I habida repuosta an suonhos, que nun tornassen a Harodes, bolbírun por outro camino pa la sue tierra.
Eibangeilho de San Mateus, II, 1-12
[Publicado por Trindade Coelho ne l diário lisboeta REPORTER [n.º 1512, de 06/01/1897]
18 de Novembro de 2007
Amadeu Ferreira
