[movido] CUOMO HOUMENAGEAR JOSÉ LEITE DE VASCONCELOS

CUOMO HOUMENAGEAR JOSÉ LEITE DE VASCONCELOS?
Na cuonbersa que tube neste fin de semana cun alguns mirandeses falemos de aguns testos que furan screbidos neste blogue, todos de grande amportância para faborecer e amplemantar la amizade, antre, nun solo aqueilhes que eiqui bamos perdendo la temideç i la bargonha de ir gatafunhando alguas eideias, mas tambien por aqueilhes que só las ban lendo, i nunca screbendo.
Falemos suobre l çtino de la nuossa lhéngua mirandesa, que puode ser determinado, anfuenciado i assegurado no sou feturo, por estes testos. Un de ls testos focados na cuonbersa fui un de Amadeu i outro de Ana Maria, relacionados cun la comemoraçon de ls 150 anhos que naciu José Leite de Vasconcelos, un de ls purmeiros i mais amportantes scritores de la nuossa Lhéngua Mirandesa (sin tirar l mérito Amadeu, na actualidade, para alguns, l maior de todos).
Cuonbersemos que todos ls que estudoran un pouco de mirandés achan que yé amportante debater la melhor forma de houmanegear, an Julho, na data an que bai a fazer 150 anhos que naciu José Leite de Vasconcelos, esse amportantíssimo scritor de la Lhéngua Mirandesa i, “dibulgar l sou straordinairo trabalho, na l’Anternete, an cumunicaçones, an comemoraçones, çtinadas a balorizar i a dar a cunhecer la Lhéngua Mirandesa”. Este anibersairo era un bun pretexto para la promoçon de la lhéngua mirandesa, “para dar a cunhecer, balorizar, dibulgar essa nuossa Lhéngua i transmitir tamien a outros, muitos outros, l gusto de la cunhecer, de la falar, de la scribir i de la daprender”
De la mie cuonbersa de fin de semana, esta promoçon yé razon bastante para sugerir este tema para discusson i para mostrarmos a todos ls mirandeses i pertueses que “somos capazes de abrir ls uolhos” i lhembrar la imensa riqueza que l mirandés ancerra, sobretudo porque puode e debe ser explorada para desanbolber aquel pequeinho, mas mui amportante cachico de l nuosso Pertual, criando cuondiçones a las gientes que eilhi biban, para santiran guosto an eilhi cuontinuar a bibir, falando i screbindo la lhéngua que aprandiran anquanto mamaban.
Deixo esta palabra de orde, cuomo se diç na tropa: “Fuorça a la pieça”, neste caso:
Cuomo houmanegear esse amportantíssimo scritor de la Lhéngua Mirandesa José Leite de Vasconcelos?.
Ls mius deseios de buonas sugestones de todos bós.
Leonardo, 14JAN07