Oupiniones i cunsidraçones

Podeis tamien poner eiqui nuobos ditos dezideiros mirandeses, que nun stéian na lista publicada. Assi, de tiempos a tiempos, la coleçon puode ser acrecentada.

Amadeu Ferreira

Mas ainda puneis las letras todas quando tubirdes bagar, ou quedais-bos por qui. Se no anpeço yá mandar!

Buonas tardes Francisco,

Hoije a la nuite bou a poner l restro de las letras.

Amadeu

Deixo aqui alguns ditos e dezideiros lhembrei i fui apontando. Mas como la lista del prossor Amadeu ye grande bai a ser deficele ancontra muitos mais, penso que alguns ban a star repetidos oixalá sein poucos.

1 – Mogadouro ye bila, Miranda nuba cidade, Bronhusino ten la fama, Sendin la mucidade;

2 - Somos del Campo nada num tenemos murri-se-mos la burrica stamos como queremos, de las patas fazimos uas danças, de la piel un bombo, i de las oureilhas uas tejeiras;

3 – Somos do Rós ninguém mos gaba gaba-mos nós;

4 – D- Ainda refunfenhegas caramonico de mil demonhos – R – L santo está nu cielo/la Virgen nu altar/ e ls curnos de bussa abó na lhagona a nadar

5 – P- Tu donde sós rapaç – R – Sou de Vidoedo mil meu senhor, terra de muita casta reduldada, mas se quer jugar uma luita calagoiça bai na burra;

6 - Agosto seca ls montes, setenbro las fuentes(deferente de todas);

7 - Algo si, mas tanto tamin nó;

8 - D- À antonho quires pan- R- You quiro/ del comer ou del de soumbrar,/del de sumbrar/ Ai, ai, ai………..

9 - A negro dito stubi-se you calhado;

10 - Anho de brebas anho de fame;

11 - Andem las leis por onde quiren ls reis;

12 - Apapará la candeia, apapará la tu que you yá nun beio;

13 - Auga mole n piedra dura tanto bate até que fura;

14 - Augas passadas nun muben molinos;

15 - Autra burra caída pali agora;

16 - Á sangre de galina negra;

17 - Aonde cantan galhos nun cantan galhinas;

18 - Antre home i mulher naide debe meter la culher;

19 - Balga-me S. Pedro de la coba;

20 - Bala-me un bourro als coices;

21 - Bale mais un trapalhon que un aranhon;

22 - Berdade berdadinha;

23 - Biúba rica casada fica;

24 - Caba de Abril para ti, caba de Maio para tou amo, caba de Junho mete-la no culo;

25 - Canta l couco e la boubilha paun, amarga l´alrabaça e queima l´algrião;

26 - Cheiras mal como un boubilho;

27 - Chegou e dixe, tirou l chapéu i fui-se;

28 - Chupa que s´apaga;

29 - Como eras i como te punis-te;

30 - Come saraças i pan pouco;

31 - Compadre dexa la burra que na burra mando you, quando quiro digo are quando nó dio xó;

32 - Dal outra que stá caliente;

33 - De les santos al natal inbierno natural;

34 - Die de Santa Cruç yá la binha reluç;

35 - Dius ls criou, dius ls ajuntou;

36 - D – I a ti que t`anporta – R - anterra ls dientes nua burra morta que you ls anterrarei nua torta;

37 - Home bielho e mulher nuba oten filhos até la spoltura;

38 - Hoje o dia está bom dia hoje o deu o repótório;

39 - Hoije el reportório bai a dar cama cedo;

40 - La cerbeija ye buna bebida, mas ye mui cara, amarga na boca i queima no bolso;

41 - La nubrina de l´auga ye madrina;

42 - Luna nuaba setenbrina, seite luna determina

43 - Luna nueba troniada, trinta dies molhada;

44 - Mais de quatro que nun fazen el que ele(ou elha) faç;

45 -Manha de nevoeiro tarde de soalheiro;

46 - Malhaba neilha cumo centeno berde;

47 - Menina bonita por pouco dinheiro a mi me la dán rai que ta plan;

48 - Natal na praça, páscoa na casa;

49 - Nubrada de preinha nunca cá benha;

50 - Nubrinas de Marçio, giladas de Maio;

51 - P- Nun te dorém nada - R- Caga-se a la puerta e limpa-ses el culo a l´aldaba;

52 - Nosso senhor te perdone se achar por adonde;

53 - Nun hai maior ceigo que aquel que nun quir ber;

54 - Paga l justo pol pecador;

55 - Pan torrado nun farta amo nien criado;

56- Prá lá do Marão mandão os que lá estão;

57 - Poda curta bendima larga;

58 – Pol mal que faç, pol bien que sabe;

59 - Pula arage se bei el que bai na carruage;

60 - P - Quanto te pagoren – R- Daus de apnha e três de agarra;

61 - Quin a las oito nun benir comerá del que trair;

62 - Quin apanha l´azeituna antes del natal deixa l´azeite no aulibal;

63 - Quin canta saus males spanta;

64 - Quin canta na cama i assobia na mesa, l juízo pouco l pesa;

65 - Quin come sin pon ye lhambon;

66 - Quin conta un counto acresenta-le un pounto;

67 - Quin corre por gousto nun se cansa;

68 - quin con garotos se deita, cagado se deita cagado s´albanta;

69 - quin fui al mar perdiu el sau lugar, quin fui al bento perdiu el sau assento;

70 - Quin dá l que ten a pedir ben;

71- Quin num pude ser burro ten que ser cabalho;

72 - Quin pobre nace, a rico yá nunca chega;

73 - Quin sal als saus nun degenera de la raça;

74 - Quin se casa quir casa;

75 - Quin yé scunfiado num ye leal;

76 - Quin te biu i quin te bei;

77 - Quin ten burro i anda a pie, bin burro yé;

78 - Quin todo quire todo perde;

79 - Quin tourto naçe tarde ou nunca se andereita;

80 - Quando eu vinha da vinha encontrei um cão que tinha tinha;

81 - Quanto maior four el bourro maior ye el tombo;

82 - Ró, ró, ró, m***a pala mai cagalhones pala abó;

83 - se tenes fame come ua pierna que ainda te queda outra;

84 - Se tenes friu, baia l riu que alhá stá tau pai cula manta cagada e cul coulo al friu

85 - Sol na eira chouba no nabal;

86 - Sos mui burro tenes muito pelo na cabeça;

87 - Sos como el burro de San Brás andas dous al pala frente e três al para trás;

88 - Tenes çede meija i bebe;

89 - Tanto dá falar cul(ou culha) come star a dormir,

90 - Uns son filhos outros son anteados

Ls melhores ditos são ls que salan na hora cierta...
Apuis de la mie filha casada nun falta quien la querga!!!
Esta ye dedicada a Amadeu

editada dia 06-01-2007 10:26:19 por: francisco

editada dia 06-01-2007 10:15:28 por: francisco

editada dia 06-01-2007 10:14:33 por: francisco

editada dia 06-01-2007 10:13:45 por: francisco

Bau a botar mais uns poucos de DITOS I DEZIDEIROS, tube el cuidado de ber se stan yá acá, mas aberá algun repetido porque uns anpecan-los du maneira i outros de outra.

1- Atanor burra maior;

2- Ah tiu peque-me no xó;

3- A la meia nuite s´alebanta l francês, sabe de la hora i nun sabe del mês, usa sporas i nun ye cabalheiro, caba nu sulo i nun acha dinheiro;

4- Andar de rouda para Pilatos;

5- Antes quebrar que torcer;

6- Antes parece-lo do que selo;

7 – A que del Rei a quin m´acuda;

8- Auga que hai fugo;

9- Baca cun bitelo bale a drobar

10- Branco ou Tinto? Cheno….;

11- Bale mais el bildre que la oubelha;

12- Bale mais el nome que la propriedade;

13- Bai a chouber canta el moucho;

14- Bai a chouber canta la cruija;

15- Botoran-se a mi como gatos a tripas;

16- Canta bien, mas nun m´alegra;

17- Casa de ferreiro speto de palo;

18- Carga de carro traseiro, nin bai para casa nin pal pulheiro;

19- Carga de carro delantreiro, bai pal palheiro:

20- Causas feitas a três el diabo las feç;

21- Comer i drumir i bida de cuchino;

22- Como el perro lhadron ye, pensa que todos son;

23- De die na cama. E de nuite na taberna;

24- De oubos fritos yá nun nacem pitos;

25- Die dous de Janeiro bai ua baca a la feira de Mogadouro que tem tantos cournos como dies
ten l´anho;

26- Ye berdade Albira nun tenies tu la culpa teni la you;

27- Ye berdade minh´abó torta;

28- El que ganhas na monda, perdes-lo na cegada;

29- El que ye miu ye miu, el que ye tou ye tou i miu;

30- Eu sou o Soares da Cunha obra feita dinheiro à unha;

31- Hai muita giente que anprenha pols oubidos;

32- La culpa mourre siempre solteira;

33- La faca corta auga i selombras de paredes;

34- La mi binha de la Marilha dou-me siete carros de oubas, mas dou la mi de la Galharda que me anchiu tolas coubas;

35- La tiera de la pingalha nun dá pan nin palha;

36- Las meias so son bounas palas piernas;

37- Manos calientes, curacon friu, badiu;

38- Manos fries, curacon caliente, ardiente;

39- Morra gato mora farto;

40- Muita Parra i pouca uba;

41- Nin que faga de las tripas coraçon;

42- Nosso senhor te dê juízo que bien falta te faç;

43- No alto d´aquel cabeço ai ua rola a rolar cul bico cheno m***a pal primeiro que falar;

44- Nun ye nada, nun ye nada, ye la noç del culo quebrada;

45- Queda tan bien como la gaita na precion de las almas;

46- Quedes-te cuntento que nin ua Páscoa;

47-Quem quer ver o seu corpo que olhe para o do porco;

48- Quin cun firros mata cun fierros murre;

49- Quien nada ye el peixe, quien nul quir quel deixe;

50- Quien bei caras, num bei coraçones;

51- Quin nun se siente nun ye filho de buna giente;

52- Quin nun tem perro caça cun gato;

53 - Queri-lo dado i arregaçado;

54- Ó Aurora, olha que agora comem se uvas e pão, mas das nossas não;

55- Ó Miguel de las ubas comes las berdes, i deixas las maduras;

56- Onde bás home spierto, bau als aolibales de tiu Caganeto;

57- Onde bás home bruto, bau als oulibales de tiu Gatuto;

58- Para quien nun quire hai muito;

59- Perro que lhadra, num morde;

60- Pal ´anho ser buno tem que haber siete nebadas i un nebon;

61- Por adonde bai el burro que bai l´albarda, por adonde bai l´albarda que bai la carga;

62- Roma e Pavia não foi feita num dia;

63- Sabe mais manhas quel mestre de la música;

64- Sabes mais que Amália i nun cantas;

65- San Sabastian guarda-me el cochinico, que quando el matar dou-te del rábico;

66- Santos de la pourta nun fazen milagres;

67- Ser probe nun ye defeito, burro tamin nó! Agora probe i burru nun hai maior defeito;

68- Sin leira nin beira, pousso-se rico como un cochinico;

69- Sin oubos, nun se fazem tortilhas;

70- Son falsos como judas;

71- Son como la flor de la marabilha lougo se costipan;

72- Son paucas i laucas…

73- Só faç falta quin acá stá;

74- Spanhol rabudo, cun três palos al culo, três a la garganta ye el diabo que canta;

75- Stás como un bourro num patatal

76- Tanto se le dou, como se le dá, ye ua Marie bai culas outras;

77- Tremie como baras berdes;

78- Trabanca burra branca;

79- Todos ls homes beben bino i só paga l triste Agostinho;

80- Todos ls pardales comen trio i só paga l triste pardal;

81- Uba, Mora i Fonte Lhadron três lhogaricos eran três lhogaricos son;

82- Ye duro, ye duro, mas bai a bater cul pai;

83- Ye pior que el dius me lhibre;

84- Ye probe i mal agradecido;

You bi bien que fui para mi, mas bamos ando i bamos bendo.

Este spacio ye de cultura i penso que de troca de algus openiones! Ainda spero poner mais alguns ditos i dezires sin staren repetidos até fazer duzintos. Destes todos nun copie nenhun de algun lhibro, muitos son cun que até procuro segir la bida. Agora se muitos stán sin contexto ou se aplican a determinados momentos ou situacion, ye berdade. Apenas segui el que antendi que se pudie fazer, se nun fure assi dezi.

Pus, el que oubi muitos dies que acumpanhei mius abós, i será a elhes que you oubi 90% del que coloquei mas ai muitos mais.

Pus pudo dar la splicacion para un, como dou para todos, mas esso anchirá muito.

"La mi binha de la Marilha dou siete carros de ubas, mais dou la mie de la Galharda que me inchiu tolas cubas.

- Segundo eilhes dezin, seri senhor Abade bilho que se estava a gabar pal abade noubo que seri el Padre Alfredo, you nun coneci nenhum. Que la binha dun daba mais que la de l´outro, algun oibiri e quedou. You oubilo muitas bezes, e nun me anportaba de cuntinuar a oubir, era buna senha.
Las binhas ainda Hoije eixisten anbora yá repostas.

editada dia 06-01-2007 18:26:07 por: almendra

An 1908, Rocha Peixoto publicaba an la un studo sobre ls apódos tópicos transmontanos yá cun berdadeiro cuorpo de doutrina i anterpretaçon . Dezie el que ls apódos móstran-mos ua cara sobre la .
Qual la ourige, porquei, i l que ye pior ye la respuosta que cada un ten porparada, que sal nun stantico i corta cumo ua spada bien aguçada, sin se amportar cun nada.

Quien bai al açougue
Se mal fala
Mal oube

Apódos, ditos dezideiros, probérbios, nun ténen sentido se nun se ancuadráren nun cierto cuntesto.

Telmo quijo dezir, i bien, esso mesmo.

Tenemos inda que strinçar uns de ls outros, mas buolberei a esto, noutro die.
Hai las respuostas prontas, ls ditos de siempre i ls que tradúzen sentencias morales.

Quanto a la quantidade que bai aparcendo, cuido que hai que tener mais cuidado, nun bamos a poner todo, mas ls que tradúzen mais la nuossa léngua i l nuosso sentir.
Se nó, mais bal ir a copiar ls libros que yá hai i que ténen quaije esses todos.

Bou a dar-bos un eisemplo:

- Ye cumo miel an çufino de perro ( anda zaparcido, nun se acha).

- Ye cumo sebo an çufino de perro (lougo se gasta, lougo zaparece).

Un abraço

Zé Chico

Deixo eiqui mais uns poucos de ditos i dezideiros.

1 -A quin madruga dius ajuda;

2 - A ti Rosa quien son ls boussos cegadores? Son ls Gandins ls Pirólises i ls Papa-lagartos!

3 - A tiu Alfredo quiro un café curto, mira you encho-te la malga i tu bebes el que quejires;

4 - A tiu Alfredo tien pierna de palo? Tu nun sabes que si su cabeça de burro;

5 - A tiu Pascoal como s´afina la gaita? Mirai ye cun a moça nouba como bós!

6 - Anda por ende a correr la cochia;

7 - Andar a bender auga sien caneco;

8 - Ainda nun l chega a ls carcanhales del (ou deilha);

9 - Al para traz meija la burra;

10 - Balga-me Nossa Senhora de las “Cambalhotas”;

11 - Bei mais l culs oulhos cerrados, que tu culs tous bien abiertos;

12 - Casa roubada trancas a la pourta;

13 - Chicharos sembram-se en Maio, mas que num quirem ber a Maio;

14 - Como dizem ls ciegos? Veremos!

15 - Comiu-le ls oulhos, e cagau-le nos poçacos;

16 - Dar el dito, por não dito;

17 - Dar ua no crabo i outra na ferradura;

18 - Deitar ceido i ciedo erger, da salude i faç desanbolber;

19 - Dou-te un conceilho de amio, adepuis tu faç l que quejires;

20 - Deixou-lo mais baixo q´el poulo de la tierra;

21 - Ei de durar cien anhos se nun murrir antes;

22 - El dinheiro num faç la giente feliç, mas tira delores de cabeça;

23 - Els podadores sculhan-se polas carteiras de bedis;

24 - Esse(a) tira-te la dereita;

25 - Esso a mi(ou a ti) só me dá amargos de boca;

26 - Esso ye conbersa de pagador;

27 - Grano a grano enche la pita el papo;

28 - La pourta de la rue ye ela serbenti de la casa;

29 - Lhebou muito pontapi por debaixo de banca;

30 - Mais bale prebenir que remediar;

31 - Mais queri ser perro, que you antrasse alhá;

32 - Num drume el sounho de la manhana;

33 - Num hai ua sin dues, nin dues sin três;

34 - O bom Jesus de Braga quer tudo e não dá nada;

35 - Pai nosso que estais no céu, botai patatas pal mil chapéu;

36 - Parece que tem l rei na barria;

37 - Passar la nuite a bolcos;

38 - Patre nostre crilaison enterrado no carreiron, para ber las piernas a las ties;

39 - Por onde beniste podes tornar a ir;

40 - Quien comiu la chicha q´arrebanhe tamin ls oussos;

41 - Quien muda dius ajuda;

42 - Quien tem miedo nun caga na rue;

43 - Quien tem culo tien miedo;

44 - Quien madruga dius ajuda;

45 - Quien mexe nu miu bolson, tem carra de lhadron;

46 - Quien muito drume pouca daprende;

47 - Quien num arrisca num petisca, quin arriscou petiscou;

48 - Quien muito scolhe pouco acerta;

49 - Quien spera siempre alcança;

50 - Quien tien miedo compra un perro;

51 - Quien tem unhas toca guitarra;

52 - Quin todo quir saber nada sel diç;

53 - Se l´arrependimento mata-se staban ls cemitérios chenos;

54 - Se ls arrependidos fussen pal cielo, staba l´infirno sien naide;

55 - Se se sube el pai el pobo fala, se se sube el filho el pobo fala, se se sube el pai i el filho cuitado del burro;

56 - Sinal na carra mulher scarada;

57 - Sinal no peito home de respeito;

58 - Stá anchado como un boto;

59 - Star cun oulho o burro i outro no cigano;

60 - Staba nu primeiro sounho;

61 - Sourte bintura;

62 - Só da un presunto a quien le dir un cochino;

63 - Só habi un como tu i afogou-se nun penico de m***a;

64 - Sós como l´air, ye para onde stás boulto;

65 - Tierra de mourones nin pan nin cagalhones;

66 - Tu nunca te bás a morrer, hás-de quedar acá para semiente que sós de bouna quilidade;

67 - Tu só l´último a falar, i quando chegar la tu belç das la beç als outros;

68 - Tu sós el sabe todo sabe m***a i num sabe nada;

69 - Tem un garfo a la pounta de baixo de las costilhas, que num le deixa bergar;

70 - Un anho perras l´outro perricas,

71 - Yá te come las sopas anrriba de la cabeça;

Bounos dies a todos, specialmente a zé que anda anspirado. Un bien haia

pos eiqui ban mas dous dezideiros:

Quien pariu que arrolhe.

Dies de muito, viesperas de nada
saudaçones sendinesas

LuíÇ

editada dia 13-01-2007 15:05:57 por: francisco

editada dia 13-01-2007 12:44:57 por: francisco

Deixo eiqui la splicacion para alguns ditos i dezideiros i outros ditos. Quiro bós dezir que pus estes mas pudie poner mais, como passo la maiori dels dies al pie del compu*ador, i como stou siempre a pensar en bárias cousas al mesmo tiempo nun fui deficele arranja-LOS. Tenie un papel a la borda de mie i iba apontando confor-me me iba lhembrando. Curtei alguns porque anbulben pesonas ou nomeadas de giente que pudén nun gostar.

Deixo anton la splicacion para alguns.

A tiu Alfredo tien pierna de Palo? Tu nun sabes que si su cabeça de burro.
Habi un tiu an Picoute que teni Pierna de Palo i teni tamien un café. Anton hiban alhá i perguntaban-le se tenie l gilado Pierna de Palo. El pensaba que le perguntaban se era l que tenie pierna de palo. Anton era por esso que el daba essa respousta. Quin l fazi la pregunta yá era pal atentar porque sabi que l quedaba anrrabiado, la de l "café curto" era tamin cul, mas essa ye facele de antender. En Sendin tamin habi un tiu que pedi un café, mas tenie que ser serbido nun chabina del Cha i dezi l - "You beber por boer quiro la malga chena".

A ti Rosa quin son l bousos cegadores? Son ls Gandins ls Pirolises i ls Papa- Lagartos.
Como sabeis até à cinquenta ou sessenta anhos, you penso que Sendin deberi ser de las tierras mais probes, i quando chegaba la cegada toca de ir por uns lado i outros a saber de amo. An timpos chegaban a ir pala Armunha que quedarie antre Tordesilhas i Salamanca. Este dito mostra tamien como la giente era mais cooperante i non tan andebidualista. La tie mostra como yá tenie ua quadrilha grande, i tenie un conjunto de famílias pala cegada que irin a cegar para eilha a torna-geira. Mas la gracia deste dito stá, como sabeis la nomeada Papa-Lagartos ye bien Sendinesa, hoube ua pessona dessa familia nun hai muitas geraçones que casou en Dues Igreijas. I quando ti Rosa staba a dezir quien eran ls cegadores staba a oubir, i la respousta imediata fui - "I ls Papa-caralh....."

Ainda refonfenhegas caramonico de mil demonhos?
Ls de Palacoulo chaman-le caramonicos, segunda l que you aubi onde tenen la casa del pobo habi ua lhagona onde afogoren el padroeiro que yé San Miguel. L santo yá staba bilho i cheno de caruncho i botoran-lo pala lhagona, al ir abaixo, l´aire de ls burracos del caruncho fazin caracoles. Hoube algun que diri, "Ainda refunfenhegas caramonico de mil demonhos", adepuis quando se atentan ls de Palacoulo eilhes daban la respousta - "El santo stá no cielo la Birgen no altar i ls cournos de boussa abó na Lhagona a nadar".

A Antonho quires pan? You quiro, mas del comer ou del de sembrar, del de sembrar, ai ai ai...
Eiqui mal ibá la bida pos yá se iba moler el pan que tenie quedado para sembrar, mala seinha.

Patre nostre crialiason enterrado no carreiron! Para ber las piernas a las ties.
Neste, ls tius de Sendin nun gostorén que anterassen l Padre Alfredo no carreiron, adepuis dizen que era para ber las piernas a las ties.

Tierra de mourones nin pan nin cagalhones!
Nun yé mintira nenhue! Se reparardes bien só ls terrenos mais fracos yé que dan mourones, ou seia en terrenos de arrena ou en tiera con oussos - que tenga lhougo piçaros. En terrenos de Pradaton nun ls bedes quaije de certeza, la tierra yé furte. Puodo dezir por speriéncia própria quanto mais rui yé la tierra mais yerba bota. Portanto en tiera fraca que dé mourones l pan tamin yé fraco. Só bai para alhá l ganado se nun tubir mais para adonde ir. Todos ls ditos que tenen a ber agricultura i cul l ciclo de l´anho tenen la sue rezon. Anbora para algus pessonas seia mais conplicado de antender porque nun tubiran ua passage por eilha.

Outro que pús, anbora nunca l oubi como dito só de conbersa, mas fizo-lo you porque ye assi na realidade Ls podadores scoulhem-se polas carteiras de bides
Neste momento qualquira un yé podador, nun ai giente para trabalhar. Mas poudo bós dezir que you a las bezes passo por un sítio, i sien saber de qui yé ua binha e sei que debe ser de ua determinada pessona só pola poda. Se ua carteira de bides nun tubir cabalhos, i cabacos, i pountas de bides del bilho, esse yé podador que ten las binhas chenas de braços i cournos de cabras, para mi yá nun sierbe para podar. Yá agora quedou outro dito por poner que diç - "La poda fui aumentada por un burro" - este dito até bai contra l que you dixe arriba mas tamin pode ser anterpretado d´outra

Bou a deixar mas dous ditos que nun pús, nó, que nun me lhembra-se deilhes i que tenén algu grácia, mas tenén que ser splicados.

A Manel! Agarrou, Zangarou i fizo de mie un Zangarriote.
Este era ua mulher mui defice-le de aturrar i que até chegarie la roupa al pelo al tiu, yé l´home un die desabafou cun cunhado i quaije a churar dezi " a Manel agarrou zangarrou i fizo de mie un zangarriote".

Outro que só you i que me apercebi del. Mas nun l squeço, i yá el tengo countado.
Un die staba you nun banco en Miranda i ua tie de ls lhados del Naso, mui lista i era negociante querie fazer un anprestimo, i l banqueiro pergunta-le:

Então qual era o montante que queria pedir? L montante yé el miu marido.

Podeis acreditar la pregunta fui essa, la respouta tamin assi fui.

Gabilan tu se quejires i outros tamin pudeis poner eiqui alguns porque tamin sabeis. Yá ponistes alguns, mas ainda podeis poner mais, you por agora tengo que rebolber la cabeça par outro lhado.

«Nun ye perciso tanta bida pa tan pouca lida»

Oubi hoije este dito, de Sendin, pul telifone, que ye cumo quien diç: esta bida son dous dies, mataciones i rábias agárran-mos lougo eilhi alantre.

Amadeu

Ei Pedro,

Essa palabra «zázia» ye rialmente bien zázia, i serie ua pena que se perdíran palabras tan zázias, i que fázen la nuossa léngua tan zázia, quier dezir, tan guapa, tan galana, tan atrejeitada.

Amadeu

editada dia 23-01-2007 12:51:42 por: francisco

editada dia 23-01-2007 12:37:27 por: francisco

Yá bai a ser hora d´almorçar i lhembrei-me de benir por eiqui. Stube no fin de semana por Sendin oube un Dizideiro que m´anganhei. Oubi-lo muitas bezes a mi bó Marie falei nel i mi Mai i miu armano lhougo me deziren que staba a dezir mal. Pensei en eiditar las mensages mas como eilhas passan pa riba la melhor maneira ye deixa-lo correcto eiqui.

Anton l dizideiro ye este:

A ti Rosa quein son ls boussos Cegadores? Son ls mius, l Jesé mi madrina, ls Gandins, ls Pirolises, ls Papa-Lagartos.

Bou a deixar outro dezideiro que me saliu agora.

" Dius perdone l miu home, era roqueiro era fuseiro i fazi uscas como l prumeiro"

Esto para dezir que sabi fazer de todo l que l pedissen para fazer. L Roqueiro ye el que faç Rocas, Fuseiro ye el que faç fusos, i la usca tamin pertenci al fuso, portanto só sabi fazer l que cumpon la rouca. Mas l dito ye para dezir precisamente l contrário ye ironico. Hai muitos ditos que son assi.

Hai uns dies atrasados deixei eiqui un dito, mas pus-lo mal. Quien me chamou l'atencion para esso fui Zé Chico (Siempre cun atento!) i eiqui le agradeço.
Anton ye assi:

Nun ye perciso tanta lida pa tan pouca bida.

Amadeu

editada dia 27-01-2007 12:41:22 por: francisco

Deixo mais três dezideiros, dous son para dezir l mesmo, l´outro achaba-le you grácia quando miu abó l dezi anton aqui ban:

Nin preta nin branca;

Nin chicha nin pan.

Estes dous dezideiros son autelizados de la mesma maneira, ye quando se fala para ua pessona i eilha nun aresponde- nun diç nada, amua.

L´outro ye este:

Nun poderá la porca cun tanto leitão

Miu abó utilizaba-lo quando se pedi demais, ou para fazer muita cousa, ou quando nun habi dinheiro para fazer tanta cousa.

Eiqui quédan mais dous ditos que hai uns dies me mandou miu armano Carlos (nun sei a quien se ls haberá oubido):

- Aturar potes i perder neilhes!

- Quien l paga i minte, la bolsa l sinte.

Amadeu Ferreira

Ditos

Zde la purmeira hora i de la purmeira partecipaçon que me bengo regalando cul que leio neste spáçio i agabo la buona partecipaçon i ampeinho cunque muitos l fázen. Stan de parabienes todos.
Mas you quedei-me siempre sin dar la mie partecipaçon, dende me benírun fuorças pa l fazer.

La cabra quiere chuiba, chuiba anté que ls cuornos s’amolhécen.
La canhona quiere niebe, niebe anté que l rabo se le pele (pelar).

-Dezírun-me que este dito fui siempre ousado i inda ye muito coincido puls mais antigos an Zenízio la mie tierra. Quien sou you, mesmo sendo d’alhá pa l zmintir, sacapei-me de garoto, i a un garoto estas cousas que splícan cultura dun pobo scápan-se debrebe, que ls ditos dezideiros son un teçtemunho.
Mas yá agora cuido que ancuontro splicaçon porque se dezie tantas bezes fazendo caçuada, …scurrie-le auga pulas greinhas que nien a ua cabra…i tamien quando se dezie … médra l pan ambaixo de la niebe cumo l cordeiro ambaixo de la pelaige….
I dua cousa you si fui teçtemunha que an tiempos que alhá ban, an Zenízio ganados de calhonas si ls habie de cabrar yá nun era bien assi.

Corroios, 29 Janeiro 07
ramosantao (Faustino Antão)

editada dia 04-02-2007 17:12:16 por: francisco

En resultado de la respousta quel Porsor Amadeu deixou a la mie pergunta de la ourie de la palabra capon saliu mais un dizideiro.

A tintina, tintina, que tu bien m´abiseste.

Para este dito houve un tiu, en tiempos, que fura de Sendin para Spanha a anxertar, mas nun sabi anxertar. Fui cula necessidade de ganhar la jorna. Quando le dorén todo l material, diz l a "tintina, tintina que tu bien m´abiseste". L spanhol arrespundiu-le - poude anxertar cun fuerça que son todas tintinas i beio que las conheces. Mas la tintina que l falava num era tintina mas si "Tantinha", como se sabe yé ua nomeada sendinesa, i era la nomeada de la mulher del tiu.

Inda hoije eixistem cepas desas Tintas Spanholas pulas binhas mais antigas, son mui duras, son doces e dan muita qualidade en cor i aromas speciales al bino, son mui parecidas cola turiga.

Questuma-se dezir que l que ten que ser ten muita fuorça. Mas esso puode-se dezir doutro modo,

Adonde has de ir nun has de fugir.

Fui Carlos que hoije mandou mais este dito, i que eiqui deixo para todos.

Amadeu

Adaige

“Cumo la baca de l probe an beç de parir, amobe”

L que bou a cuontar, fui berdade.
Quaije nada ten haber cul adaige, mas amentar nestas cousas afila la meimória de ls mais bielhos i ls mais nuobos quédan a saber cumo la bida era dantes. Assi i todo, fai-mos bien falar doutro tiempo, para dantender ls dies de hoije, i quien saber purparar l de manhana?
Un anho miu pai (tiu Zé Gregório de Zenízio) tenie quatro baquitas i ua bitela que nun staba amansiada.
Arrimaba-se l tiempo de la sembra, que la querie fazer cun dues juntas, mas ua baca amobiu i morriu-se. Las cuntas de miu pai quedórun, cumo se adebina, pochas, nun amansiou la bitela na bima, lhougo nun araba na sementeira. Para cumponer la cousa, i ua zgráçia nun ben an bun tiempo, quien iba arar, anquanto el sembraba i adubaba teniemos que ser nós, you i mius armanos. Pus nun teniemos lhombo pa l sembradeiro, l mais bielho era de l tamanho de la rabiça, mas esso bai que nun bai inda l fazimos porque las bacas bielhas éran mansas cumo lhiezmas.
Fui-se a saber de l Doutor Barros. Querie ua baca “de meias”.
L quel sfregou lhougo las manos de cuntento, habie-los que dezien, i sabien de l que falában, que tenie ne l Cunceilho uas trezientas bacas i nanhua loija.
Cousas de la bida dun probe, nun bonda ua baca amobir-se i ten lhougo que muorrir-se.
Faustino Antão

Ei Faustino,

Nun sei se antendi bien l que eran essas bacas d'ameias, que l dr. Barros (tengo uas buonas cun esse tiu i miu abó de las calças) tenie, sien loinja. Gustaba que splicasse melhor essa parte, se podires.
Un abraço,
Amadeu

[Citado=amadeu dia: 21-01-2007 21:18:46]
Ei Pedro,

Essa palabra «zázia» ye rialmente bien zázia, i serie ua pena que se perdíran palabras tan zázias, i que fázen la nuossa léngua tan zázia, quier dezir, tan guapa, tan galana, tan atrejeitada.

Amadeu [/Citado]
salude a todos, bau a poner aqui um dito que simpre me l dzi miu pai quando yeu era garoto e que ye bin berdade!
NUN AI ATALHOS CIN TRABALHOS NIN RODEIRAS CIN CANCEIRAS

MANEL.

Amigo Amadeu
Antes de botar mais un adaige, i un cachico de cumbersa, bou a ber se splico l que quiero dezir cun bacas d'meias, i que l dr.Barros, nun tenie nanhua loija.
Era assi:
Miu pai percisaba dua baca para lhabrar, mas nun tenie denheiro pa la mercar. Pedie a quien puodie, (neste causo l dr.) que éran ls que tenien denheiro. Ajuntában-se ls dous nua feira, i abaluában ua, pagaba l rico i l probe quedaba cun eilha. Ls bitelos deilha era lucáros a rachar al meio. La baca era siempre de l dr., i s'acauso houbisse algue zgáçia l probe quedaba ampenhado. Que nunca se muorri-se la baca d'meias
L dr. dezien que tenie ua buona buiada i nunca mundou ua loija.
Cuido que era ua cousa asparcida ls tratos de quinteiros.

Agora outro Adaige

“ Trés candeias a arder bótan ua casa a perder”

-L que tengo gana dezir subre este adaige, ye que quando you me criei las eideias subre la deféncia i porteçon de la natureza éran muitas.
Quemiemos l caldo a lhuç de candeia, nun era de candeias, nien a la lhuç de bombilha. D'azeite ou de Peitrol, era la mesma cousa, oulibeiras nun teniemos i ne ls poços solo manaba auga. Ls mius, estas dues cousas tenien que mercar, se l peitrol lo mercában ne l soto, l azeite la cousa inda era pior.
Ne l termo de Zenízio oulibeiras nun habie.
Se la mais de las bezes se rejaba la chica para arregar las patatas cozidas ne l prato i se ponie unto ne l caldo, l azeite fazie falta an casa. Nien que fura solo pa las malzinas i delores de barriga.
Cumo aparecie an casa?
Teniemos que ir pa l cunceilho de Bimioso ua ou dues semanas na temporada a l’apanha d’azeitunas an pagas de traier azeite.
Porque se pagaba cul cuorpo, siempre salie mais an cunta que mercá-lo a la puorta als azeiteiros de Carçon, que querien crouas cuntadas.
Ora ye buono de ber que yá éramos eicologistas antendidos i cumbencidos de l mal que fazie tener muitas candeias a arder l mesmo tiempo. De l mal que fazie la chamarielha i l morron de las torcidas de las candeias, spargindo fumo negro.
Apagabamos las candeias, la natureza agradecie i spraba-se pula lhuç de l sol de soutro die.
Faustino Antão

editada dia 24-02-2007 20:06:24 por: amadeu

Oubrigado amigo Faustino.
Ye cumo you cuidaba. Éran solo ls doutores de Miranda que dában bacas d´a meias. I nun poderien ser tamien canhonas (yá que habie pastores que tenien un tagalhico i l mais de las canhonas éran del) ou cochinos. Cuido que nas canhonas l pastor solo las lhebaba a pacer i trataba deilhas, i recebi ua paga, mas eilhas éran siempre de l duonho i ls cordeiros tamien.
Nun antendi l seguinte: dezis que se la baca se morri-se l probe quedaba zgraciado. Porquei, se la baca era de l outro? Nun era este que debie poner alhá outra baca?
Essa buossa cuonta de l azeite an Sendin passaba-le algo aparecido culas castanhas, yá s´íban a apanhar pa l cunceilho de Mogadouro, an beç de las mercar. Mas habie giente de l termo de riba adonde nun habie oulibeiras que tenie oulibeiras an Sendin, mesmo no meio de tierras de ls outros.
Mais ua pregunta, Faustino: an Zenízio nun ousábades palicos secos de gamoneira ou de xara (steba) para lhuzir, an beç de la candeia?

Éran duonhos de todo até de muitas mulheres. Inda hoije assi ye, solo cun ua çfrencia, ye que hoije son duonhos de todo até de las cuncências.
Cuitado de quien nun tén que comer. I hai muita gente a pasar fame mesmo cerca de nós.
Tenemos que cuntar muita cunta berdadeira.
Nó solo las de atrás, mas de hoije. I hoije nun hai sculpa, que todos sáben melhor l que fázen.

Amigo Amadeu.

Apuis de haber falado nas baças d’a meias i cumo era l trato, deziedes-me bós, i s’acauso eilha lhebaba camino ou se morrie?.
You nun tengo bien claro cumo era, falei culs de l miu tiempo i tamien nun tenien bien l’eideia cumo era, ye ua cousa a ambestigar culs mais bielhos.
Anté puodie haber çfrenças duns pa ls outros, bários tratos.
Mas cumo este sítio ye de oupeniones, i ye dando-las a coincer que se fai camino, alhá bai la mie.
-Se la baca era abaluada, pus algues tiempos apuis bendida puodie baler mais, ls lúcaros (bitelos) i la balorizaçon éran pa ls dous, será que l dunho de l denheiro cunfiaba ne l meeiro? Ls ricos siempre fúrun amigos d’ajuntar denheiro al sou denheiro, nunca de l spargir, se dában bacas d’a meias era porque era denheiro lhimpo i cierto. Mas la mie oupenion ten l balor que ten, todos somos lhibres al menos a pensar.
You porque fui criado al pie dun bezino que solo daba ua garrafa de bino quando era tiempo de, i porque tenie un balado por scabar, quedei-me assi.
Mas bamos a la redadeira percura que me fazistes. Se an Zenízio nun ousabamos palicos de gamoneira ou de xara para lhuzir an beç de candeia? Que you m’alhembre nun ousabamos. Un tiçonico que assoprabamos para l’acender, esso si, para sustituir las çerrilhas, mas era qualquiera que stubira a modo na fogueira i scobas ne l forno para saber se staba na rojura.

Agora outro dito:

“Nun fai mal poner l lhume al pie de la stopa, l mal ye se ben l diabro i assopra”

Este dito, era muito ousado puls pais quando mandában las rapazas a ser buieiras nas tardes solheiras. Nisso nun habie mal nanhun, l mal era se tamien andában puli rapazes.
Anton si, l diabro puodie assoprar.

Faustino Antão

Dous perros gordos nun se muorden

Bai mais un pala semba.

L que ye squecido, nin ye dado, nin agradecido.

bau aponer tamin ua que scalha ya sta mas nun anporta.

:star cumu um burro nun patatal:

Este ansinou-me-lo tiu Jesé Franco de la Frauga, hai muitos anhos a la borda del chafariç de l Bergel.

You stabá a silbar a las mulas para que eilhas bebisen auga.

I diç-me l a Jesé hai três causas que nun bale la pena fazer no mundo que son:

Nun bale la pena alhumbrar un ciego, porque nun bei;
Nun bale la pena peinar un calbo porque nun ten pelo;
I nun bale la pena silbar a les burros qundo tenen l´auga a la frente deilhes.

zé mialito

bunas a todos, bau a deixar agora um dito que ben mismo a calhar par este timpo;
Quin belau belau que março antrau

Auga mole en piedra dura, tanto dá anté que fura.

editada dia 07-03-2007 12:13:50 por: almendra

Ora bai mais este:

L segredo ye l´alma de l negócio.

Mais un:

Quien todo quier saber dasse l culo a lhamber.

Fracisco,

Acho que antendi, mas gustaba que splicasses l dito, pus puodo nun haber antendido todo.

Un abraço,
Amadeu

editada dia 14-03-2007 19:28:02 por: francisco

Buno, bós na lista teneis un eigual, you fui a ber se este staba na lista i reparei que este serbi para dezir la mesma cousa, mas era deferente.

L que teneis ye: quien todo quir saber da-se le un courno a lhamber.

You quando pus aqueilhes todos pos outro que qier dizir la mesma cousa que yé:

Quien todo quir saber nada se l diç.

Portanto you siempre fui mui perguntunho quando era garotico, inda hoije, anbora nun pergunte tanto, porque aspero saber sin perguntar.

Adepuis a mi deziem-me : quin todo quir saber nada se le diç.

Estes ditos serán aplicados a ls coriosos. Todos sabemos que a las bezes quando comunicamos se stobirmos só a scuitar, l´outro antrelocutor acaba por mos dezir todo, sien perguntar.

abraços

zé mialito

Oubrigado Fracisco,

Fui cumo tu splicas que you antendi.
Mas cumo screbiste dua maneira que deixa dúbedas i puode dar a antender l cuntrairo (dasse l...) preguntei.

Amadeu

Ai, que si sois bien maldosico(risos), you nun l tenie botado para essa maldade, mas que dá a antender, dá!

Este dito nun l ´oubi en Sendin, aprendi-lo cun colega de trabalho.

Bunas noites e até la proxima pandega....

zé mialito

editada dia 19-03-2007 12:34:40 por: francisco

editada dia 19-03-2007 11:31:09 por: francisco

editada dia 19-03-2007 11:28:10 por: francisco

editada dia 19-03-2007 10:56:19 por: francisco

Mais um:

Ua causa ye conta-lo, outra causa ye belo.

Bino-me este dito a la cabeça por outra causa que quiro screbir no Blog, assi que tenga mais tiempo.
Las causas nunca son contadas como son bistas, ou nun se ten l´eideia de como l´as causas están na realidade.

zé mialito

Fui mie mai que dixo este dito hai uns dies. Acrecentou que datrás se dezie muito, mas you fui la purmeira beç que l oubi i pul sms de miu armano Carlos.

Diç assi:

Quien trabalha ten alfaia.

editada dia 21-03-2007 23:15:20 por: francisco

L que custa nun ye bibir, ye saber bibir.

Yá que naide bota, boto you.

Hai ua tie en Sendin que tenie ua horta al pie de la noussa que dezi pale home "bota Manel, bota, que you mudo", i l tiu bota a botar auga a la cigounha e eilha a mudar ls sucos. Esto só fui por falar en bota, que sirve para dezir muita cousa.

Hoije lhembrei-me destes ditos:

Cada un faç cula sue.;

Bas a torcer l´aurelha e nun bai a correr sangre.

zé mialito

Las pitas son cumo las oubeilhas: nunca stan fartas.

editada dia 25-03-2007 17:46:43 por: francisco

Habi un tiu na rue de l Baiunco que era Jesé Tato.

La mai dezi-le assi:

"A Jesé tol mui faç casa, só tu nun fazes casa", i l respodi "i tu sós la bia(biga)". L dezi-le a la mai era la bia porque era mui grande.

L dito poede quedar " - A Jesé tol mundo faç casa, só tu nun fazes casa; - i tu sós la bia.

Tiu Jesé era shordo i era bezino de tiu Cetrino de l Baiunco. Adepuis tiu Cetrino atentaba-lo.

Un die Jesé diç assi: nun sei se ye l lagato(lagarto), se ye la queluba(quelubra) se ye la teixuda(teixugo) fura la bobeda toda na Arena(Arenas).

Tiu Cetrino atenta-lo col dito , "a Jesé nun sei se ye l lagato, se ye la queluba, se ye la teixuda que fura la bobeda toda na Arena, i tiu Jesé responde-le bai-te yé furar la baria(bariga) a ti, que lá tenes mui gande (grande).

You hai nun coneci a tiu Cetrino, mi abó e que me cuntaba este dito.

Tiu Jesé tenie ua mula braba, como era shordo era scunfiado.

Un die boto las mulas a scatrapulhar, i la mula de l nun fui capaç de fazer bida deilha nien de l butar la unha. Con ls mius bezinos passaba-se l mesmo, anton dezi l para nós.

You bou-le as dezir a tou pai que tu sos maco.

zé mialito

- Alho, porque nun medreste?
- Porque por San Martino nun me sumbreste.

Onte andaba no miu hourto i oubi falar este dito para cun mi mai.

"Dar a deus a quien ten mais que nós"

Cun esto, querie la tie dezir que só se debe dar a quien ten necessidade ou nun poude coumprar, ou ten menos do que nós, ou tamien a quien nun bale la pena dar.

Oubi-le este dito a mie mai, an 30.10.2005:

Nun compres la mula manca cula tençon que sane.

editada dia 12-04-2007 10:57:54 por: francisco

Bou a deixar mais este dito, que se l oubi a mius abós muita beç.
Oubi-lo siempre meio prenunciado en spanhol i meio en mirandés, nun sei se serie por miu abó tener ua abO del que era spanhola, i l dito talbeç benga dalhá.

Anton quando nun querien enprestar ua cousa, subretodo ua mula ou ua burra, dezin assi:

" compadre decha la burra que na burra mando iou, quando quiro digo arre, quando nó digo xó."

zé mialito

Aquel(ou aqueilha) por onde bai nun arrodeia....

editada dia 14-04-2007 20:52:22 por: amadeu

Quando ls cuornos de l bui súdan ye cierta l´auga
Este fui oubido por mi i tamien me fui ambiado por sms por C. Ferreira

editada dia 16-04-2007 12:55:00 por: francisco

"Parece dinheiro d´antramoços, nun rinde lhougo s´ acaba."

Presunçon i auga benta cada un cuolhe la que quejir.

"quien nun tien dinheiro nun tien bicios"

Denheiro i santidade de la metade la metade.

Guarda un buono forrador para un gastador.

Nota: Com dinheiro pouco custa fazer.
Quando pensei na escola infantil não havia dinheiro e Sendim foi a primeira oficial no Distrito.
O ciclo a mesma coisa.
Os Bombeiros igual.
De uma vez por todas " O seu a seu dono ".
Mas há mais...........

Quien quier belhotra, que trote

" quien tira i nun pon, debrebe chega al fundon"

Als alhos en Abril,
Nun le toques, nin cun la punta de l mandil

Se ua pessona comir caldo de bóbeda,

ls bezinos quédan uito dies sien pulso.

Esta del caldo de bóbeda nun antendi.

Miu abó siempre me dezie para nun comer caldo nu die d´antruido, para me ber lhibre de ls moscos durante l´anho.

I se nun me squecir nu die d´antruido nunca como caldo.

zé mialito

Mira Jesé, mie mai diç que ye un caldo mui fraco, tan fraco que deixa até fracos (sien pulso) ls bezinos a quantas mais a a quien l come.

Por la Santa Cruç yá la binha reluç.
Nas arribas yá berdegan hoije.

Aí dous ditos pal die d´hoije, que se nun me anganho ye die san Marcos.

Un ten a ber colo outro, i son contrários, you sien ir a ber penso que yá pus ls dous.

"San Marcos bota las brebas abaixo cula sue caiata."

Por estes dies caí siempre ua giladica e las fieiras sien foulha yá tenen brebas, i gilabán-se.

I outro ye este:

"Anho de brebas anho de fame"

Neste dito reparo you tols anhos, i en anhos en que aí brebas nun hai fartura como en outros anhos. En conclusão será melhor que nun haba brebas e que san Marcos las bote abaixo por estes dies.

El de la Santa Cruç yá muitos anhos que nun ye balibo, polas fotografias de Carlos i you tamien yá bi nel fien de sumana e senhor Porsor confirma, las binhas yá berdegan l que se ben a passar yá alguns anhos para cá, i l die de Sanra Cruç só ye nel três de Maio, inda faltán mais de oito dies.

zé mialito

editada dia 24-04-2007 21:42:25 por: francisco

editada dia 24-04-2007 21:40:22 por: francisco

Confirmei i hoije 24 d´Abril nun ye die San Marcos i manhana die 25 de Abril. Mas la causa i la mesma. Hoije i die San Fiel, confirmei cun miu armano que hoije faç anhos, l que you tamin debie saber.I como tenemos un perico que se chama Fiel, que gusta que you baia a Sendin porque come tanta chicha como you, i nos outros dies nun la proba. You chamo-le Fiel amigo, l nin sequira ye bacalhou, mas you i l yá cacemos dues meis lhibres mas esto nien se debie dezir, mas fui berdade. Ye por esto, que you debie saber que hoije era l die de San Fiel i manha San Marcos.

Jesé, sabes ua cousa, faziste-me rir cun essa de l perro. Ye por estas i por outras que bal la pena benir al SAL.
Yá que la bida por bezes nun mos ajuda i a mi ultimamente ten me tocado de todo, inda bien que hai sendineses cumo tu.

Un abraço, mas de berdade.

Yá aguanto mais un pouco, que a las bezes la bida custa.

Oubrigado

Cunta miu pai que mie bó Fracisco Bandarra dezie l seguinte dito:

arrenego de la mula que fal innn
i de la mulhier que sabe latin

Nunca la ambeija medrou, nin quien al pie deilha morou.

"Un perro nun pode ber outro"

"Quando un home stá no solo todos l dan porrada"