Repuostas al eisercício (13) - Bamos a screbir II

editada dia 10-03-2007 18:00:25 por: Antonho Lobron

L Eimbierno

Cumo l tiempo demuda!

Inda agora, agorica, scuito: "manhana, purmanhana, bien cedico tenemos d´ir cun la burrica apanhar ua carga de lenha". L friu era tanto! Ls lhençoles, ls cobertores i las mantas de farrapos éran pouco peso para acalcer ls pies i l restro del cuorpo. Até l bafo era friu.

Manhana, mal l die sperta, uas abanadelas anriba de l cuorpo androminhado i ancolhido. "Bamos, stá na hora". Cabeça fuora de las mantas i l purmeiro a spurmentar l friu era l nariç. Nun hai gana mas ten que ser.

"Mete un carolo de pan nua fardela, daqui a cachico yá tenes buntade".

Ls purmeiros raios de sol assomában-se mas ls candilones çpindurados nun dában muostras de ampeçar a derretir. L çanceinho coalhaba todo. Las passadas ne l camino restralhában scachando l carambelo. Las manos angaranhidas…

Cumo l tiempo s´antranha an nós! La primabera de nuossas bidas deixa manchas afincadas i bien fondas. Ls carreirones, ls arressaios i la caminada que nos trouxo até hoije, faç de la houmanidade i de cada un de nós l que berdadeiramiente somos, "todos defrentes i todos iguales".

L que çtingue un home de hoije dun home que bibiu hai quarenta, cinquenta, quinhentos, mil, dous mil anhos atrás?

Se la sue eijisténcia ye sobrebibéncia: pan para comer, agasalhos pa se calcer, la demuda nun ye grande. Pouco le debe amportar, se tubir l stómado para alimentar, andar a cabalho nun burro ou nun carro.

Sócrates, Platão... Camões, Cervantes…Pessoa, Natália, meditórun, pensórun, questiónarun, screbírun i l que demudou fui l stilo, l tema i la realidade i bibéncias de cada era.

L tiempo demudou. Ls eimbiernos son mais amerosos mas ls beranos bien mais calientes. Todos ls dies la telebison fala un castástrofes, giente que se muorre cun chenas i mais malinas que you sei alhá. Cada beç hai mais carros que bótan fumos i strágan l aire. Ls homes ténen que tratar melhor la tierra senó qualquiera die bai todo puls aires.

Cumo l tiempo demuda…no ampeço iba a lheinha, agora scribo nun cumpu*ador, scuito música…"rapazica, rapazica se fui..". Cumo l tiempo demuda i se manten…

Antonho Lobron
10Mar07

L tiempo

Falar de l tiempo que nunca ye nuosso, que queremos agarrar. L tiempo ye ua cousa que anda por riba de nós, que só mais tarde damos por el. Purmeiro anda longe, acena-nos, i nós biramos-le las cuostas. El que passe, que lhougo faremos las cuontas çpuis de la scuola. Apuis achega-se de mansico, i trai las purmeiras cuntrariedades. L´anho nun passa, ten sido. Pa l´anho todo será çfrente, fago vinte anhos i serei grande. Stou tan oucupado an tantas cousas, que nin dou por el, nun fura ls garotos a lhambra-lo. Dei por mi a botar cuntas l tiempo palantre. Çtremeci cul balor ancuntrado. Quijo bultar para trás, i nun fui capaç. Quiç reambantá-lo i çcusou-se. Olho pa las streilhas i nun las beio, scuito l´auga a correr ne l rigueiro i nun oubo nada. Ye l´eimbirno de l nuosso tiempo.
Válter Deusdado

L Eimbierno

Scebir subre l Eimbierno ou las caras de l Eimbierno bibido dantes!
Se fura giente daba-se-le muitas caras, cara de, cara d’airaçada, cara de culo de lhobo, cara de pantasma, cara de miedo, cara de quien nun se gusta, cara de todo.
Mas nun ye giente, i l sou tiempo ye bien rial, puode sentir-se, tener-se, gustar ou çpreziar.
Ua beç l Eimbierno fui lhebado a la persénca dun doutor juiç.
Si porque nestas cousas de gustar ou nun gustar hai siempre demandas, hai siempre aqueilhes que nun quieren ber que l todo se fai de cachicos, buonos,s i assi assi. Subretodo quando se ten ua senhora Purmabera guapa i pimpona, un senhor Berano i un senhor Outonho.
Cuns amigos assi quien quier oubir falar d’Eimbierno!?
Acusában ls que nun gustában del, maldezindo:
-El ye feio, ye l repunsable puls dies pequeinhos, chubiosos i sien sol, pulas nuites fries i giladas, pulas manhanas nubrinadas, pul sanseinho i carambelo.
Quien ls oubie, çfazie-se an lhamentaçones i feturaba de todas estas acusaçones un cartigo pesado, ua cundenaçon pula cierta.
Squecien-se que todo ten dues caras, la buona i la mala, daqueilha que se gusta i de la que nun se gusta tanto, quantas bezes bien armanas, só que stan l rebeç, ua bei-se melhor que la outra, mas stando atiento nun ye çfícele d’ancuontrá-las a dambas a dues.
Anton chegou la beç de l juiç precurar ls outros.
L que teneis a dezir a todo esso?
Ls outros respundírun:
Nós cuidamos que se ls dies son pequeinhos nun hai mal nanhun, pus assi se ten mais tiempo pa l caliente a cama, para star ambaixo de las mantas lhanudas, se nesse tiempo chuobe mais ye ua cousa buona, pus yá que ls mius parientes, que eilhes agában tanto son secos. Mirai bós, cumo la sue pariente Purmabera iba a tener tantas froles sien auga, se las nuites son mais fries i giladas ye para que las pessonas téngan tiempo de fazer ls serones, quemer las tabafeias, fazer ls belhós i cuontar lhonas i lhiendas als mais pequeinhos.
Por todo esso i muito mais que eiqui nun fui dezido, cuidamos que l Eimbierno nun debe ser castigado.
Al fin todos quedórun amigos de l Eimbierno.

L Eimbierno

Al serano d’Eimbierno.

Ua de las cousas que a mi siempre me gustou fui ls seranos pul Eimbierno.
Nun hai ne l anho todo, un tiempo tan guapo cumo l tiempo que fai ne l Eimbierno.
Las cousas neste tiempo demúdan tantas bezes que ua pessona, ten mesmo que quedar encantada cun todo.
Ye l friu, la chuíba, l carambelo, l sanseinho, la nebrina, la niebe, las geladas, las anchenas, las lhagonas, ls rius i rigueiros que lhebando mais auga tóman outra bida.
I ye nesse tiempo que se puode fazer las balintes fogueiras de cepos.
Al alredror de la fogueira, cun todo aquel chiçpar de las brasas, las chamarilhas, las stórias, l cumbibio de to la família, fai cun que esse tiempo seia tan çfrente que queda na memória para siempre. An special ls seranos que se fazírun aquando de pequeinha.
L miu gusto pul Eimbierno nun ben solo puls serones i pula calor de la fogueira, mas tamien porque se nun fusse l Eimbierno nun puodie ber, las demudas de ls dies, las manhanas nebrinadas carregadas de sanseinho, ls campos todos ancubiertos de niebe, las lhagonas cun carambelo, sentir l friu de las geladas.
Mas por biens que séian ls dies, al serano squecie-se todo, la calor de la fogueira ye cumo un milagro para todo. Ademais se la cumbersa arresbalar pa las stórias i lhonas.
Este gustar ben-me zde quando you era pequeinha, por bias de las cuontas que mie abó cuntaba, relhembro-las i cuido solo s’anténden porque éran cuntadas cun l tiempo que fai ne l Eimbierno, als serones i an pie de la fogueira.
Cuido que nun tenien tanto sabor cuntadas noutro tiempo que nun fura este.

editada dia 14-03-2007 21:49:22 por: Ana Maria F

Hai uns dies pra acá, you i mie mai tubimos ua cunbersa que poderá parecer mui banal: stubimos a falar de l tiempo que fazie i de la pouca niebe que caiu este anho... A dada altura, mie mai até fizo ua cumparaçon:

- Un die, an Sendin, ne ls anhos cinquenta, inda tu nun eras nacida, tubimos dous metros de niebe!
- Ah mai, dixe-le you mui admirada, tanta niebe an Sendin ye ampossible! Mais que la altura dun home nun puode ser !
- Talbeç nó, respundiu anton eilha, mas l que ye berdade fui que nebou que se fartou. Ua cousa nunca bista!

Nun era la purmeira beç que oubie mius pais (Miu pai tamien noutras oucajiones) a falar dessa niebe memorable que caiu ua beç an Sendim an mui grande quantidade i de que muita giente inda hoije nun se squeciu... Subretodo que naqueilha altura la niebe era cunsiderada la maior parte de las bezes cumo qualquiera cousa que traie inda mais dificuldades na bida de todos los dies: friu, maleitas, dor, afliçon, sofrimiento i até probreza. Dificuldades para todo, de que hoije por bezes yá quaije nos squecimos i que nun ye, de maneira ningua, einútele recuordar: dificuldades para las cousas mais eissenciales cumo ir buscar auga a la fuonte, lhabar i secar la roupa, carregar feixes de lheinha nas cuostas i traiê-ls para casa, tratar de ls animales i fazer tantas i tantas outras cousas cumo esta que tamien me cuntou mie mai: tener por eisemplo que ir a moler grano, mesmo durante l Eimbierno, ne ls molinos que habie naqueilha altura nas ribeiras para fazer farina sin la qual tamien nun se podien fazer la fogaças, comer i matar la fame!
Fui assi que hoube un anho an que ua mula (ou cabalho...) que pertencie al pai dua prima deilha que era molineiro se chimpou, partiu ua pierna i até lhebou camino só por causa de la niebe que era muita ne l camino de Sendin para ls molinos de la ribeira de Las Lagas! I ua mula, naquel tiempo, cumo todos sáben, tenie un balor cumo hoije un carro, inda por riba sin seguros i nin nada!

Feliçmente, las cousas bien demudórun! Ls mius filhos, por eisemplo, que ténen hoije la mesma idade que aqueilha que mie mai tenie por cierto quando apareciu essa grande nebada an Sendin ne ls anhos cinquenta, quédan todos cuntentos i até eixitados quando ampéçan a caer fulhecas de niebe i stan siempre cun buntade, quando apánhan “bacanças” durante l Eimbierno, que ls lhebemos a fazer squi ne ls Pirenéus. Tornórun-se specialistas na prática desse çporto zde que, hai uns anhos, fúrun squiar durante quaije quinze dies cun la scuola i çcubrir toda la riqueza que tamien ouferece la muntanha quando stá toda cubierta por mais de meio metro de niebe durante bários meses ne l Eimbierno... Bien ancalorados i eiquipados, yá nun ténen miedo ningun, mesmo cun temperaturas muito abaixo de zero, de subir até 2000 metros de altitude ou mais, ne ls telesquies i telecadeiras, para decer depuis, an riba de ls dous palos mui soufisticados i angenhosos que yá lhebában atados als pies, çcansadamente ou anton cun ua belocidade inimaginable (Ye todo ua queston de controlo i de speriência!), essas muntanhas antre las mais altas de la Europa i até de l Mundo, mesmo a la frunteira antre la França i la Spanha... “Las sensaciones i las paisages son berdadeiramente, dízen eilhes todos cuntentos i satisfeitos, spectaculares!”

You ye que inda nunca m’afiç mui bien a essa prática çportiba... Porque tamien nunca quije ansistir... até que un die destes me cunbença a sperimentar mais a sério i ultrapassar toda i qualquiera apreenson para me dar cunta you tamien que si ye berdade:
Tanto las sensaciones cumo las paisages dében de ser por cierto, cumo nun púoden deixar de ser, únicas, spectaculares...i tamien stroudinárias i eicecionales!
Que cousa essa de tener miedo ou apreenson! Bota palantre!

(Mais cousas poderie dezir mas quédan para outra beç! Yá las ultrapassei las binte linhas!)

editada dia 18-03-2007 19:31:00 por: Pinheirinho

L EIMBIERNO

L Eimbierno yé ua de las quatro staçones de l´anho. L Eimbierno tien einício cul sulestício de l Eimbierno e acorre por bolta de l 21 de Deziembro i termina cun eiquinócio de la Primabera que acuntece pul 21 de Márcio .
L Eimbierno oucupa parte de ls meses de Deziembro, Janeiro, Febreiro i Márcio.
L Eimbierno no Praino Mirandés stá associado al friu i a la niebe, i gusta de reunir ls amigos an redor de ls tiçones, buendo ua pinga e comiendo uns chichos, puis yé durante l Eimbierno que se mata l cochino i se faç ls serones por bias de las nuites seren mui grandes i ls dies pequeinhos.
L frio i la chuba gustam de correr p´las rues, muontes i bales molhando todo quanto ancuontran. Pul Eimbierno scuita-se muitas bezes por alrebés de la tierra, anraibado cul troban, por ampurrar las nubres uas cuntra las outras, ouriginando arlistros que las cunfunde i las oubriga a bolar pelo cielo à percura dun canto assossegado.
La naturieza yé mui cumpleta. Sien l Embierno ou outra stacione de l anho nun habie bida. Ninguno puode bibir sien l Eimbierno, miesmo siendo feio i mal ancarado tenesmos que gostar deilhe. Faç falta para todo.

L’ Eimbierno

L’Eimbierno yé la derradeira staçon de l’anho, i cumo qualquiera staçon tene la sue guapeça.
Quando nieba la paisage queda alba, i la albura yé sinhal de pureza. La niebe cul seu frio gelado bai matar ls parasitas que biben en la tierra i l’auga queda para que tudo se renobe. La renobaçon yé feita para bien de unos mas para de loutros, mas yé penha que ls homess nun se puodan renobar cumo las staçones para que l mundo fora un cachico mais buono.
Cumo yé ua staçon mui fria, l frio sierbe para que las cousas se pudan cunserbar yé por esso que la matança de l cochino se faç nel Eimbierno i l friu sirbe tamien para cunserbar l celeiro que se fuie cugulando al lhongo de la staçon de l’Outonho i que tene de chegar anté que bengan las nuobas colheitas.
L’ Eimberno sirbe tamien para çcansar un cachico de la labuta que tubo de fazir al lhongo de las outras staçones.
Cun la staçon de l’Eimbierno ancerra un nuebo ciclo de bida. Para la natureza cula Primabiera ai ua renobaçon, mas pa ls houmanos yé la sue derradeira staçon, yé la staçon de las soidades i en que todos loss mos achacam para mos cunsemir l’sprito. Apuis de ua bida de labuta yera buono que todos pudessan gozar la belhice cun salude.

editada dia 27-03-2007 20:13:25 por: Tonux

editada dia 22-03-2007 1:14:37 por: Tonux

Eiqui bai l miu testo

L’Eimbierno

Recuordo-me dun eimbierno que you passei nua aldé de la Sierra de Montezinho (acerca Baçal), onde you tenie alguns familiares. You era, inda, un neno mui pequeinho; tenie para ende uns 5-6 anhos.
Fui un eimbierno mui duro, como son to ls eimbiernos transmuntanos. Durante ls 15 dies que you alhá stube, ua semana hoube ua niebra mui cerrada to ls dies i to las nuites. L friu era mui fuorte, un geleiro. Ls campos staban gelados. De ls arboles, sin fuolhas (exceçon pa las oulibeiras), i de las teilhas parecie que calian guotas de gelo. An Mirandela, onde you tenie más familiares, l riu Tua gelou. Solamente sabie bien star drento de casa, bien perto de l lhume, a la lhareira. Mas you, cumo era inda un neno, nun staba quieto na casa i resulbi abrir la puorta i salir. Pareciu-me tener lhebado un guolpe de nabalha, tal era l friu.
Ampurriei un cachico más la puorta gelada i sali. Fuora, staba un bezino, l tiu Joaquin, que prontamente me dixo que era peligroso ir más alhá, puis ls lhobos podian fazer-me mui mal, podian comer-me! Preguntei al tiu Joaquin cumo eran ls lhobos.. al que el me dixo que eran parecidos als perros, mas muis. Nun lhadraban, uibaban.
You siempre tenie oubido dezir que ls perros eran ls melhores amigos de l Home, anton ls lhobos nun podian ser cumo ls perros! Eimaginei ls lhobos cumo sendo criaturas munstruosas, ouscuras, scondidas na niebra cinzenta i gelada. Lougo senti un arrepiu más fuorte que l de l friu.
Un outro tiu, antretanto se juntou a nós. Era un tiu que tenie un falar special, cun calatelisticas spanholas. Era coincido cumo “o espanhol”. Era l tiu Xosé, nacido an Sturias i staba casado cun ua filha de l tiu Joaquin. Este tiu tamién me dixo, cun l sou falar special: “Tien cuidado con los llobus, niñu. Ba, ba a casa, llistu, niñu, pos puedes ser atracao por elles”. Mesmo assi, you antendi l que el dixo. Era la mesma cumbersa de l tiu Joaquin. Apuis un tempico, ls dous forun para casa i you resulbi ir atraç deilhes, para nun ficar solo na niebra gelada. Solo? Possiblemente nó. I ls lhobos? Esta cumbersa… you nun ls bi ou senti! Bolbi, anton a casa, pensando que ls tius tenian bebido uns copicos de bino para se caleceren… Fechei la puorta gelada i fui para junto de l lhume i de ls mius familiares, pensando inda cumo serian ls lhobos.

Salude

Tonux.