La Stória

Sendin ne ls caminos de Santiago?

La pregunta fui puosta, yá un bun par d’anhos, por Arlindo de Magalhães Ribeiro da Cunha, ne l sou studo “A travessia do Rio Douro na peregrinação Compostelana” [Brigantia, vol. XIX, nº 1/2, 1999, pp. 53-69]. Antre las bárias que apersenta para atrabessar l Douro, l outor pon las seguintes alternatibas, quanto a la parte de l riu Douro ne l termo de Sendin:

«- Outra alternativa era atravessar o Douro entre Pinilla de Fermoselle e Sendim. Seguiam depois os peregrinos por Prado Gatão, Palaçoulo, Águas Vivas, Vilar Seco, Coelhoso e Bragança”.

- Mas podia também atravessar-se o rio entre Fermoselle e Urrós [adonde habie ua barca], e seguir depois o caminho de Travanca, Eiras, Vimioso e Bragança».

Cumo l riu Douro nun tenie puontes, a cierta altura aparecírun las barcas “de por Deus” i lugares de acolhimiento pa ls pelegrinos, subretodo ne ls sítios mais buscados i famosos, antre ls quales staba la barca de Ruolos, adonde tamien habie ua albergarie. Mas nien siempre se atrabessaba cun barcas, podendo fazer-se mais facelmente ne l berano.

L outor nun diç de modo çclarado adonde assenta la sue heipótese, mas cuido que poderá tener a ber cula Capielha de San Paulo, que queda delantre de Penilha. An tiempos, essa eirmita haberá serbido, antre outras funciones, para dar apoio a pelegrinos que puli passássen. Sabemos que essa passaige era ousada por outras rezones, chegando a haber eilhi un rapaç moço que ajudaba a passar las pessonas que nun sabien nadar i querien ir al outro lado, por eisemplo a casamientos. L último rapaç que fizo esse trabalho fui muorto a tiro puls carabineiros, ne ls anhos quarenta de l seclo XX, quando passaba ua tie de las Fidalgas de Prado Graton, que iba a un casamiento al outro lado.

Un outro punto para assentar esta teorie stá an que la deboçon a San Roque ye fuorte i antiga an Sendin, sabendo-se que muita beç esse santo, que se apersenta de caiata i calabacica, stá liado a las pelegrinaçones a Santiago de Cumpostela.

You mesmo yá screbi ua cuonta dun pelegrino que bai para Santiago i passa por San Paulo [Fracisco Niebro (2000) «Longe queda Santiago» in Las Cuntas de Tiu Jouquin, Campo das Letras, pp. 26-33].

Este ye solo un cachico de la stória de l Riu Douro cumo punto de ounion antre ls dous lados. Essa stória inda nun stá feita i ye nun fácele fazé-la, mas muito mais se poderá inda dezir, tamien cun assento na tradiçon oural. Un die destes tornaremos al tema.

28 de Dezembre de 2006

Amadeu Ferreira

Abiso: Este testo, cunsante las regras de la Cumbençon Ourtográfica de la Lhéngua Mirandesab i de la sue Purmeira Adenda, stá screbido cun L- an percípio de palabra, a la moda de l mirandés de Sendin.

1642 – Sendinés preso an Spanha por roubar un cabalho

Siempre ls sendineses stubírun mui liados al outro lhado de l riu, a las tierras de Sayago. Íban para alhá a trabalhar, íban a las fiestas, casában-se i namorában cun gientes dalhá. A la bezes scapában-se pa l outro lhado quando la justícia andaba atrás deilhes i de alhá benien para acá pula mesma rezon. Ne ls tiempos negros de l’Anquesiçon tamien muitos benírun dalhá para acá i muitos fúrun dacá para alhá. Todo essa stória que puode ajudar muito a splicar l que Sendin fui i se fizo, inda stá por fazer.

Deixo eiqui ua pequeinha notícia dun sendinés preso an Spanha, por roubar un cabalho, ende por meados de l seclo XVII, nien sequiera alhá benindo l nome del. Fazie çúcia cun outro de Penilha.

“Las primeras noticias que tenemos sobre el latrocinio de ganado corresponden a los años 1642 y 1713 en Fermoselle y Salce respectivamente. En éste último lugar fue un caballo, «negro estrellado», que, al parecer, pastaba en el lugar de Roelos y pertenecía a la Parada de Postas de Salce, cuyo encargado, Santiago Peña, efectúa la denuncia. Los auctores, un vecino de Sendin en Portugal y otro de Pinilla son encarcelados en Fermoselle, a pesar de jurar ser buenos cristianos y hombres de bien. Al año de estar en la cárcel, el alcaide denuncia el «escalo y fuga» del portugués, atribuyendo la responsabilidadd a su compañero en el cargo, quien estando de guardia y por negligencia le deja escapar. El cómplice de Pinilla se ha de defender apelando al “procurador de pobres”.

CASTAÑO BLANCO, José Manuel (2001), Conflictualidad y Violencia. La Sociedad Sayaguesa en la Documentación de los siglos XVI al XIX, Madrid, p. 61.