Yá aqui se falou de que l decumiento mais antigo que fala de Sendin son las Anqueriçones de D. Fonso III, de 1258. Esso nun quier dezir que Sendin nun eisistira muito antes, anque ls decumientos nun mos ajúden muito.

L que eiqui quiero dar notícia passou-se ne l tiempo de l rei D. Fonso II i ten a ber cun las antrequidéncias que houbo antre el i las armanas. El nunca deixou de defender l poder de l rei i las armanas pedírun-le ajuda al rei de Leon, D. Fonso IX, que se casou cun ua armana de D. Fonso II. Fui assi que este rei bieno por ende afuora i circou Bergança i muitas outras tierras, antre eilhas las tierras de Miranda, arrasando bários castielhos, cumo l de Algoso. Hai até quien fale que fúrun arrasados ls castielhos de Sendin i de Picuote, mas nun sabemos la fé que mos puode merecer la notícia, yá que nun coincemos l decumiento oureginal adonde assenta (1). Houbo outras guerras de ls reis de Leon cun Pertual, nesses tiempos de l ampeço de la nacionalidade i até mais tarde i Sendin, cumo tierra de frunteira, nun staba a salbo.

Por mi, cuido que inda hai muito que ambestigar ne l que respeita a la stória de Sendin, yá que hai castros i poboados antigos pul nuosso termo, i talbeç a eilhes se querga referir la notícia que dou arriba, quando fala an castielho. I mesmo andrento de la nuossa bila ye possible dar cun cousas bien antigas. Por mi cuido que hai que le dar atençon a la barreira de la Calçada que abaixa pa la Fuonte de l Lugar i a la barreira de las Eiras de l Cemaque. Son cousas que ende stan, a merecer melhor studo. L que you soubir i podir eiqui lo eirei deixando.

Abiso: Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá screbido cun "L" an percípio de palabra, a la moda de l mirandés de Sendin.